«Հրապարակ» թերթը գրում է. «Հայաստանի եւ Արցախի համար այս ճակատագրական ու օրհասական պահին, երբ բոլոր սրտացավ ու հայրենասեր մարդիկ պայքարի են դուրս եկել, եւ, ամենակարեւորը` երիտասարդությունն է ակտիվացել. ուսանողները երեկ դասադուլ էին հայտարարել, շատ դպրոցների ավագ դասարանների աշակերտները դպրոց չէին գնացել, բուհերի ռեկտորատները, ի տարբերություն 2018 թվականի, ամեն ինչ անում են՝ այս պայքարը ճնշելու համար․ սպառնում են, զգուշացնում եւ այլն:
ԵՊՀ ՔՊ-ական ռեկտոր Հովհաննես Հովհաննիսյանն ավելի հեռուն է գնացել, հայտարարել է, որ գործադուլ անող աշխատողների եւ դասերը չիրականացրած դասախոսների բոլոր բացակաները դրվելու են, այդ օրերի համար նրանց աշխատավարձերից պահումներ են անելու եւ դեկտեմբերին էլ 13-րդ աշխատավարձ չեն տալու: Եթե դա շարունակվի, կարող են նաեւ համալսարանից հեռացվել: Իսկ այն ուսանողները, որոնք դասադուլ են անում, կրթաթոշակներից կարող են զրկվել, եւ թույլ չեն տալու, որ անվճար տեղերի մրցույթներին մասնակցեն: Նույնիսկ կարող են հրահանգ իջեցնել դեկաններին` այդ ուսանողներին քննությունների ժամանակ քննել ամենախիստ ձեւով, չնշանակել եւ դուրս թողնել համալսարանից:
Սակայն այս սպառնալիքները չեն խանգարել, եւ երեկ դասադուլին ամենաակտիվ մասնակցած բուհը ԵՊՀ-ն էր, որտեղ դասեր երեկ չկային, եւ ԵՊՀ շատ ուսանողներ ու դասախոսներ ողջ օրը մասնակցում էին մայրաքաղաքում ընթացող անհնազանդության եւ բողոքի ակցիաներին: Անգամ ապօրինի ձերբակալվածների մեջ կային ԵՊՀ ուսանողներ ու դասախոսներ: Մեր զանգին ի պատասխան, ԵՊՀ ռեկտոր Հովհաննես Հովհաննիսյանը եռանդուն հերքեց` ոչ մի նման բան չի եղել, ինքը ոչ մեկին չի սպառնացել։ «Ոչ մեկի հետ, ոչ մի նման բան… զանգեք խոսնակին, չեմ կարող....»,- նշեց ԵՊՀ ռեկտորը եւ անջատեց հեռախոսը, իսկ քիչ անց անհասանելի դարձավ»:
