«ԱՍ արդարադատություն» մրցանակաբաշխության շրջանակներում www.analitik.am-ը ներկայացնելու է նոմինանտների կենսագրությունը, ինչպես նաև հարցազրույց վերջններիս հետ, որի նպատակն է հասարակության անդամներին հնարավորինս շատ տեղեկություն տրամադրել արդարադատության ոլորտի գործիչների վերաբերյալ: Ստորև ներկայացնում ենք ՀՀ Վերաքննիչ քրեական դատարանի դատավոր Գրիշա Մելիք-Սարգսյանի կենսագրությունը, ինչպես նաև հարցազրույցը վերջինիս հետ.
Կենսագրություն
Ծնվել է` 1952թ. հունվարի 30-ին Երևան քաղաքում, ծառայողի ընտանիքում:
1968թ.-ին ոսկե մեդալով ավարտել է միջնակարգ դպրոցը:
Գերազանցության վկայականներով ավարտել է ԵՊՀ իրավաբանական ֆակուլտետը` 1973թ-ին.:
1979 և 1986թթ. ավարտել է Խարկովի և Մոսկվայի կատարելագործման ինստիտուտները:
1973թ.-ից աշխատել է ՀՀ դատախազության համակարգում` որպես քննիչ, դատախազի օգնական, Ղուկասյանի և Ախուրյանի շրջանների դատախազ, ՀՀ դատախազության վարչության ավագ դատախազ:
1999թ-ից նշանակվել է ՀՀ վերաքննիչ քրեական դատարանի դատավոր:
Բազմիցս խրախուսվել է, տույժեր չունի:
ՈՒնի արդարադատության ավագ խորհրդականի և պրոֆեսորի կոչումներ:
ՌԴ բնական գիտությունների Ակադեմիայի և Հասարակության և բնության գիտությունների միջազգային Ակադեմիայի իսկական անդամ է (ակադեմիկոս):
Զբաղվում է քանդակագործությամբ:
Կառուցել է մատուռ և եկեղեցի:
Ավանի Սուրբ Աստվածածին եկեղեցու ատենապետն է:
ՈՒնի երեք զավակ և ութ թոռ(առայժմ):
Կինը և զավակները նույնպես իրավաբաններ են:
Հայաստանի և Արցախի գրողների միության անդամ է:
Հրատարակել է իրավական, խոհական և երգիծական թեմաներով 26 գիրք` «Հանցագործության լաբիրինթոսում», «Հանցավոր աշխարհի ուրվապատկերը», «Հերկեր», «Դիմաքանդակ», «Զավեշտի հանդես», «Երգիծանք և քծնանք», «Խեղկատակները» և այլն: Բազմաթիվ գիտական և հրապարակախոսական հոդվածների հեղինակ եմ: «Ոզնու» կրկնակի դափնեկիր է:
-Կայացրած դատական ակտերի հանդեպ քաղաքացիներն անվստահություն հաճա՞խ են հայտնում՝ բողոքը տանելով վերադաս դատարան:
-Դատական ակտերը ենթակա են բողոքարկման նյութական և դատավարական նորմերի խախտման դեպքում: Անվստահության հիմքով դատական ակտերը բողոքարկման ենթակա չեն և չեն բավարարվել:
-Դատավորն արդարադատություն իրականացնելիս, լինելով ազատ և անկախ մարմին, ամբողջությամբ կարո՞ղ է զերծ մնալ կողմնակի ազդեցություններից և միջամտություններից:
-Օրենքի պահանջի համաձայն` այո:
-Ինչպե՞ս եք վերաբերվում երդվյալ ատենակալների ինստիտուտի գաղափարին, արդյոք այդ կերպ արդարադատությունն ավելի անաչառ և օբյեկտիվ չի լինի, հնարավո՞ր է, որ ՀՀ-ում էլ ներդրվի երդվյալ ատենակալների ինստիտուտը:
-Առանձնապես ծանր հանցագործությունների գործերով օրենսդրության համապատասխան փոփոխությունների պայմաններում` կարելի է:
-Ինչպե՞ս եք գնահատում հասարակություն-արդարադատություն փոխհարաբերությունները, արդյոք քաղաքացիները վստահում են դատարանին և բավականաչափ տեղեկացված են օրենքներից, թե՞ ոչ, եթե ոչ, ապա ի՞նչ անել հասարակության իրավագիտակցությունը բարձրացնելու համար:
-Հասարակության կենսական և սոցիալական պայմանները բարելավելու պայմաններում կբարձրանա նաև նրանց իրավագիտակցությունը:
Քվեարկելու համար այցելեք www. p-as.am