«ՆԱՏՕ-ի գագաթնաժողովը հիմնականում Ուկրաինայի ու Իրաքի դրությանն էր վերաբերվում, Լեռնայի Ղարաբաղի հարցում բանաձևը որևիցե դրական արդյունք չտվեց»,-այս մասին այսօր «Անալիտիկ» կենտրոնում տեղի ունեցած ասուլիսի ժամանակ ասաց քաղաքագետ Երվանդ Բոզոյանը:
«ՆԱՏՕ-ի խնդիրը ոչ թե այդ երկրներում տեղի ունեցող խնդիրների բացումն էր, այլ ՆԱՏՕ-ին հետաքրքրում էին այդ երկրների հարաբերությունները Ռուսաստանի հետ և հենց այդ պատճառով էլ Հայաստանի համար ոչ բարենպաստ բանաձև ընդունվեց, քանի որ ոչ մի խոսք չկար ազգերի ինքնորոշման մասին: Հայաստանը պետք է ամեն ինչ անի, որպեսզի այդպիսի բանաձևեր չընդունվեն, քանի որ դա կարող է ազդել նաև Մինսկի խմբի աշխատանքի վրա, վերջինս հետագայում կարող է ավելի կոշտ կողմնորոշում ունենալ Հայաստանի նկատմամբ»,-ասաց բանախոսը:
Խոսելով Հայաստանի պետական պրոպագանդայի մասին, բանախոսը նշեց, որ այն շատ ցածր է և տեղեկատվական պատերազմի ժամանակ մեր երկիրը հենց այդ պատճառով է, որ տանուլ է տալիս: Տեղեկատվական պատերազմի ժամանակ հայերը ադրբեջանցիներից պաշտպանվողի դեր են կատարում. «Ըստ էության պատերազմի վտանգը գալիս է այն ժամանակ, երբ կողմերից մեկը զգում է իր անպատժելիությունը, սակայն բոլորովին վերջերս սահմանում տեղի ունեցած դեպքերը Ադրբեջանին ապացուցեցին, որ մենք ունենք հզոր բանակ և նրանք անպատիժ չեն կարող մնալ»:
Անդրադառնալով Սոչիում օգոստոսին տեղի ունեցած եռակողմ հանդիպմանը, բանախոսը նշեց. «Հանդիպման ժամանակ Ռուսաստանի նախագահը ամեն ինչ արեց, որպեսզի պատերազմ չլինի: ՌԴ-ի ազդեցությունն այս հարցում շատ մեծ էր, պետք է խոստովանել, որ Ռուսաստանի լծակները խաղաղության պահպանման հարցում շատ մեծ են: Ադրբեջանը ևս մեկ անգամ համոզվեց, որ նա արժանի պատասխան կստանա հայկական կողմից և նրա քայլը չի պաշտպանվում ո՛չ Մոսկվայի, ո՛չ Վաշինգտոնի և ո՛չ էլ Եվրոպայի կողմից»:
Անդրադառնալով Հայաստանի ներքաղաքական զարգացումներին, բանախոսը ասաց, որ կան նոր մարտահրավերներ, իշխանությունները պատրաստվում են որոշակի փոփոխությունների, այս պահի դրությամբ օրակարգում հայտնի քառյակի տասներկու կետերի խնդիրն է դրված, որի շուրջ մինչև սեպտեմբերի վերջ տեղի են ունենալու քննարկումներ , որոնք էլ որոշակի արդյունք կտան. «Ճամբարների տարբերությունը այս պահի դրությամբ տեսանելի է, սակայն այդ տարբերությունը որևիցե փոփոխություն չի տվել դեռ»:
Անդրադառնալով Հայաստանի Նախագահի հայտարարությանը, որ հոկտեմբեր ամսին Սահմանադրական փոփոխությունների հայեցակարգի տեսքով փաստաթուղթ պետք է ներկայացվի, ասաց. «Այս ուղղությամբ մեքենան արդեն աշխատում է: Նախագահը հորդորեց իր կուսակիցներին ակտիվորեն այդ գործողությունների մեջ ներգրավվել: Սակայն քառյակում այս հարցի վերաբերյալ միասնական տեսակետ դեռ չկա: Կարծում եմ, որ ժամանակին կհասկանանք, թե քաղաքական ուժերն ինչ դիրքորոշում կունենան: Քաղաքականությունը ցանկությունների ու հնարավորությունների արվեստ է և Սարգսյանը շատ լավ հասկանում է, որ եթե հանրությունը դեմ լինի Սահամանադրական փոփոխություններին, ապա դրան պետք է հասնել ժողովրդին համոզելու ճանապարհով»: