Փետրվարի 19-ին «Լուսավոր Հայաստան» կուսակցության Կառավարման խորհրդի առաջին նիստի ժամանակ Վիկտոր Ենգիբարյանն ընտրվեց ԼՀԿ-ի միջազգային կապերի պատասխանատու: Analitik.am-ը զրուցեց Վիկտոր Ենգիբարյանի հետ ԼՀԿ արտաքին քաղաքական կողմնորոշման և նպատակների մասին:
Պարոն Ենգիբարյան, վերջերս Դուք ընտրվեցիք Լուսավոր Հայաստան կուսակցության միջազգային կապերի պատասխանատու, ի՞նչ ծրագրեր ունեք, մասնավորապես, ո՞ր կուսակցությունների և ո՞ր երկրների հետ եք տեսնում ԼՀԿ-ի հետագա հնարավոր համագործակցության եզրերը:
Լուսավոր Հայաստան կուսակցությունն արդեն իսկ համագործակցում է ԱԼԴԵ-ի հետ, այն եվրոպական լիբերալ կուսակցությունների դաշինք է, որը ներկայացված է Եվրոպական խորհրդարանում և ԵԽԽՎ-ում իր խմբակցությունների միջոցով: ԱԼԴԵ-ն անդամ կուսակցությունների միջոցով նաև ներկայացված է տասնյակ եվրոպական երկրների խորհրդարաններում, որոշ երկրներում ԱԼԴԵ-ի անդամ կուսակցություններն այս պահին իշխող ուժ են: Իհարկե, այս համագործակցությունը և՛ երկկողմ է, և՛ բազմակողմ, ուստի մենք առաջիկա տարիներին կփորձենք հնարավորությունների ողջ տիրույթում կապեր հաստատել և զարգացնել: Կուսակցության նախագահն անցած տարի արդեն իսկ այցելել է Եվրոպական խորհրդարան և հանդիպումներ ունեցել ԱԼԴԵ-ի բարձրաստիճան ներկայացուցիչների հետ, այդ թվում՝ խմբակցության ղեկավարի: Մյուս կողմից՝ Էդմոն Մարուքյանն ակտիվորեն գործունեություն է ծավալում ԵԽԽՎ ԱԼԴԵ-յի խմբում:
Սուղ ռեսուրսների առկայության պայմաններում կփորձենք նաև գործակցել ԱՄՆ և այլ երկրների համախոհ կուսակցությունների հետ:
ԼՀԿ-ն ունի՞ հստակ արտաքին քաղաքական դիրքորոշում: Հայտնի է, որ որպես կուսակցություն այն լիբերալ արժեքների հետևորդ է, սա նշանակո՞ւմ է, որ ԼՀԿ-ն համարում է, որ Հայաստանի համար ավելի նախընտրելի դաշնակիցներ են ԱՄՆ-ն և ԵՄ-ն: ՀՀ-ՌԴ հարաբերություններն ինչպե՞ս եք պատկերացնում:
Մեր նպատակն է Հայաստանը ժողովրդավարական երկիր դարձնել, կրթության և գիտության վրա հիմնված ազատ շուկայական հարաբերություններ կառուցել և միասնության ու անվտանգության կայուն հեռանկարներ ունենալ: Այս նպատակին հասնելու համար մեզ համար օրինակելի է եվրոպական փորձը:
ԱՄՆ-ի հետ ներկայիս հարաբերություններն անբավարար են, հսկայական ներուժ կա, որը, ցավոք, չի օգտագործվում:
ՀՀ-ՌԴ հարաբերությունները ևս զարգացման կարիք ունեն, այստեղ անհրաժեշտ է ամրապնդել մեր գործընկերային կարգավիճակը և գտնել խելամիտ հավասարակշռության մեխանիզմներ:
Ընդհանուր առմամբ Հայաստանի արտաքին քաղաքականությունը լուրջ վերանայումների և նոր բովանդակությունների հաղորդման կարիք ունի:
