Մի կողմից ընթանում է բանակցային գործընթաց, ինչպիսին է օրինակ` խաղաղության պայմանագրի շուրջ ընթացող գործընթացը, և մյուս կողմից մենք իրականության մեջ տեսնում ենք Ադրբեջանի ավելի սրվող հռետորաբանությունը, սպառնալիքները և գետնի վրա ագրեսիվ գործողությունները։ Այս մասին կառավարության հետ հարցուպատախսանի ժամանակ ասաց ԱԳ նախարար Արարատ Միրզոյանը։
Միրզոյանը ընդգծեց, որ Հայաստանը ստացել է Ադրբեջանի հերթական առաջարկները և ներկայումս աշխատում են դրանց վրա։
«Առաջիկայում կլինի մեր առաջարկները։ Նշածս հռետորաբանությունը և ագրեսիվ կեցվածքը ոչ միայն չեն նպաստում խաղաղության գործընթացին, այլև նոր խոչընդոտներ են ստեղծում այդ ճանապարհին։ Մենք հաստատակամ ենք, մեր դիրքորոշումը չի փոխվում, մենք համառորեն ու անկեղծորեն շարունակելու ենք բանակցել՝ նպատակ ունենալով տարածաշրջանում երկարատև ու կայուն խաղաղություն հաստատել»,- ասաց Արարատ Միրզոյանը։
Նա նշեց, որ Հայաստանը չի բանակցում Լաչինի միջանցքում անցակետ դնելու հարցի շուրջ։