ԱՀ ԱԺ ընդդիմադիր «Արդարություն» խմբակցության ղեկավար Դավիթ Գալստյանն ասել է, որ Արցախի նախագահ Սամվել Շահրամանյանը «զրուցել է գերեվարված նախկին պաշտոնյաների հետ, նրանք ասել են, որ խոշտանգումների չեն ենթարկվել», հայտնում է «Ազատությունը»։
Գալստյանը տեղեկացրել է, որ պարբերաբար հանդիպում են Արցախի նախագահին։
«Երբ մենք պատգամավորներով հանդիպում էինք նախագահին և հարցրել էինք՝ ինչ նորություններ կան մեր գերեվարված բարձրաստիճան պաշտոնյաներից, ասաց, որ նորմալ է, խոսել է: Նրանք այնտեղից ասել են, որ իրենց առողջական վիճակը նորմալ է, խոշտանգումների չեն ենթարկվել», - ասել է Գալստյանը։
Արդյո՞ք Շահրամանյանն է նրանց հետ կապ հաստատել, թե արցախցի պաշտոնյաներն են այնտեղից միջնորդավորված զանգահարել, պատգամավորը մանրամասներին չէր տիրապետում։
Արցախի Պաշտպանության բանակի նախկին հրամանատար, Արցախի Անվտանգության խորհրդի նախկին քարտուղար Սամվել Բաբայանը 44-օրյա պատերազմի հանգամանքներն ուսումնասիրող քննիչ հանձնաժողովի նիստից հետո լրագրողներին ասել է, թե տեղյակ է՝ Արցախի նախագահ Սամվել Շահրամանյանը այսօր էլ կապի մեջ է Ադրբեջանի հետ։ Բաբայանի խոսքով, այդ մասին արցախցի պատգամավորներին ասել է ինքը՝ Շահրամանյանը։
«Շահրամանյան Սամվելը, որին դուք ընդդիմադիր դաշտը շատ սիրում է, հիմա բանակցում է, ամեն օր զանգում է Բաքու, խոսում է, հիմա ի՞նչ է բանակցում, իրեն հարցրեք։ Ես չգիտեմ, տեղյակ չեմ»,- ասել է նա։
