Ազգային ժողովը շարունակում է առանձնանալ իր ուշագրավ պետգնումներով, այդ թվում՝ առանց մրցույթի գնումների իր պրակտիկայով. 168.am-ի ուշադրությանն է արժանացել մի պայմանագիր, որը թույլ կտա հետտոնական հաշվարկ իրականացնել:
Այսպիսով, պարզվում է՝ ԱԺ այգու ամանորյա ձևավորումն ու տոնական ծրագիրը պետբյուջեի վրա արժեցել է 11 միլիոն 60.700 դրամ: Իսկ գնման պայամանագիրը կնքվել է հրատապ մեկ անձ ոչ մրցակցային ընթացակարգով. տպավորություն է, որ Ազգային ժողովի համար Ամանորն անսպասելի է եկել, և գնումը ստիպված են եղել կատարել այս ընթացակարգով:
Մատակարարի` Լիանա Գալստյան ԱՁ-ի ընտրությունը ևս ուշագրավ է. պարզվում է՝ այս ԱՁ-ի հետ ԱԺ-ն դարձյալ նույն՝ հրատապ մեկ անձ ընթացակարգով մեկ այլ պայմանագիր է կնքել ընդամենը հունիսին՝ ձեռք բերելով Երեխաների պաշտպանության օրվան նվիրված տոնական ծրագիր: Այդ պայմանագրի գինը պետբյուջեի վրա արժեցել էր 3 միլիոն դրամ:
Ըստ պետգնումների armeps համակարգի՝ ԱԺ-ն 2023 թվականին ՀՄԱ ոչ մրցակցային ընթացակարգով 5 գնում է կատարել՝ այդ թվում ձեռք բերելով, օրինակ, 7 միլիոն 836.000 դրամ արժողությամբ ամառային դպրոցի հյուրանոցային ծառայություններ «Վերածնունդ Հայրապետյան» ՍՊԸ-ից, 13 միլիոն 494.000 դրամով շենքերի, շինությունների ընթացիկ նորոգման աշխատանքներ՝ «Արտշին պլյուս» ՍՊԸ-ից և այլն:
