Վերջին օրերին ակտիվ քննարկումների դաշտ մտած թեման՝ 4 գյուղի հանձնման վերաբերյալ և անվտանգային և երկրի կենսունակության տեսանկյունից վերաբերում են ողջ հանրապետությանն ու նրա ապագային:
Այս մասին ԱԺ հայտարարությունների ժամին ասաց «Պատիվ ունեմ» խմբակցության քարտուղար Տիգրան Աբրահամյանը:
«Մի պահ մի կողմ թողնենք «դավաճան», «հանձնող», «տապալող» բառերը, որոնք բնութագրիչներ են դարձել վերջին տարիներին, որպեսզի շեղումը դրա վրա չլինի և հարցի բովանդակային կողմին անդրադառնանք: Փաշինյանը հայտարարեց, որ սահմանազատման և սահմանազատման գործընթացը մտնում է գործնական փուլ և այն կարող է սկսել է Բաղանիս, Բերքաբեր հատվածից:
Ի՞նչ փաստաթղթերի ու քարտեզների հիման վրա է այն կատարվելու, քանի որ մինչև հիմա էլ ՀՀ տարբեր պաշտոնյաներ նշում են, որ բանակցությունների հիմնական հակասություններից մեկը, որն արտացոլված է Ադրբեջանի իշխանությունների պաշտոնական հայտարարություններում, վերաբերում է սահմանների ճշգրտման տակ դրվող քարտեզներին և իրավական բազային»,- նշեց Աբրահամյանը:
Նրա խոսքով, եթե այս հարցում չկա դիրքորոշումների համաձայնություն, ապա ինչի՞վրա է իրականացվում այս պահին 4, իսկ հետագայում 4 անկլավների հանձման գործընթացը:
Հայաստանի իշխանությունը վերջին փուլում Ադրբեջանի պահանջած 4+4 գյուղերի թեմայի համատեքստում խոսում էր Ադրբեջանի կողմից հայկական տարածքների օկուպացիայի մասին, սակայն հիմա երբ խոսվում է գործնական քայլերի մասին, չգիտես թե ինչ տրամաբանությամբ հանձման-ճշգրտման գործընթացը տեղի է ունենում միակողմանի:
«Փաշինյանը նաև ասում է, որ իր քաղաքականությունն այն է, որ պետք է պատերազմ թույլ չտանք, ակնարկելով այն հանգամանքը, որ Ադրբեջանն իր հետ սպառնալիքի լեզվով է խոսում ՝ ինքն էլ ստիպված հասարակությանն է շանտաժի ենթարկում: Եթե հիմքը այն է, որ ամեն ինչ տանք, որ պատերազմ չսկսի, բայց հանրությունը լավ գիտի, որ այս սկզբունքը չի աշխատում և նույնիսկ միակողմանի զիջումներից հետո Ադրբեջանը գնացել է նոր ագրեսիայի:
Երբ դու քո հրապարակային խոսքի հիմքում այս սկզբունքն ես դնում ՝ քո թուլությունն ես ի ցույց դնում թշնամուդ՝ նրան նոր խաղաքարտ տալով: Իշխանությունը երկրի ներսում, այդ թվում նաև այս դահլիճում խոսում է հոխորտանքների ու վիրավորանքների լեզվով, իսկ երբ խոսքը գնում է Ադրբեջանի սպառնալիքներին պատասխանելուն, ապա խոնարհ, ստորացված, կուչ կեցվածքում է»,- ընդգծեց Աբրահամյանը:
Նա հավելեց, որ հայկական և հակահայ ուժերի մասին՝ և այստեղ, և այս դահլիճից դուրս գտնվող գործիչների, ուժերի, առաջնորդների քաղաքական հետագիծը բոլորի աչքի առաջ է եղել և պատմությունը շատ հստակ արձանագրելու է՝ ով է հայրենիք ազատագրել և ով է զիջել ու հանձնել մեր հայրենիքը:
