Այսօր ‹‹Անալիտիկ›› մամուլի ակումբը հյուրընկալել էր ՀՀ Սոցիալական ապահովության պետական ծառայության պետի առաջին տեղեկալ Սմբատ Սաիյանին:
Ասուլիսի ընթացքում բանախոսն անդրադարձավ երեխայի խնամքի համար նպաստի, երեխայի խնամքի համար տրամադրվող նպասի և մայրության նպաստի տրամադրման կարգում կատարված փոփոխություններին:
Սմբատ Սաիյանը նշեց, որ անցյալ տարվա վերջին ու այս տարվա սկզբին ՀՀ կառավարությունում ընդունվեցին կառավարության մի շարք որոշումներ, որոնցով փոփոխություններ կատարվեցին երեխայի նպաստի տրամադրման վճարման կարգում:
Մանրամասնելով այս ոլորտում տեղի ունեցած հիմնական օրենսդրական փոփոխությունները՝ բանախոսը նշեց. ‹‹Տարեվերջին ընդունված որոշումներից մեկի համաձայն՝ երեխայի ծննդյան ու միանվագ նպաստը և խնամքի նպաստը ստանալու կարգը փոխվեց: Այս նպաստը ստանալու համար նախկինում շահառուն ինքը պետք է ներկայանար ու դիմում ներկայացներ: Հետայսու դիմումը կարող է ներկայացվել ցանկացած անձի՝ այդ թվում 3-րդ անձի միջոցով››:
ԲՆախոսը հայտնեց, որ տարեվերջին ընդլայնվեց ընտանեկան դրամագլուխը տնօրինելու կարգը: Մասնավորապես, հունվարի 20-ին կառավարությունում որոշում ընդունվեց, ըստ որի՝ քաղաքացին կարող է իր ընտանեկան դրամագլխից ոչ ավել, քան ամսական մինչև 25 հազար դրամ ստանալ ու ծախսել՝ սեփական կարիքները հոգալու համար:
Անդրադառնալով այս փաստին՝ բանախոսը նշեց. ‹‹Այդ դրամագլուխը վերոնշյալ կարգով տնօրինելու իրավասությունը ծագում է երեխայի մեկ տարին լրանալուց հետո, այսինքն՝ եթե երեխան ծնվել է մինչև 2014-ի դեկտեմբերի 31-ը, ապա համապատասխան անձը հնարավորություն ունի տնօրինելու ընտանեկան դրամագլուխը՝ նշածս կարգով:
Բնականաբար, 2015 թվականի ընթացքում ծնված երեխայի պարագայում նշածս կարգը կգործի երեխայի ծնվելուց 13 ամիս հետո: Ենթադրենք՝ 2015-ին ծնված երեխայի դրամագլուխը տնօրինելու հնարավորությունը կծագի 2016-ի մարտին»:
Նրա խոսքով՝ այս դրույթներն ունեն ժամանակավոր բնույթ. «Այսինքն՝ այս կարգը կգործի մինչև 2016 թվականի վերջը: Այդ ժամանակ արդեն հնարավոր չի լինի նշածս կարգով տնօրինել դրամագլուխը››:
Բանախոսը հիշեցրեց, որ սույն թվականի հունվարի 20-ին ընդունված որոշման համաձայն՝ երեխայի ծննդյան միանվագ նպաստն ու մայրության նպաստը վճարվում է բացառապես անկանխիկ եղանակով:
Անդրադառնալով անկանխիկ վճարման եղանակներին՝ վերջինս նշեց. ‹‹Այս դեպքում առկա է անկանխիկ վճարման երկու եղանակ՝ առաջին տարբերակն այն է, որ ՀՀ Աշխատանքի և սոցիալական հարցերի նախարարության հետ համապատասխան պայմանագիր կնքած անձը բանկում ունի հաշվեհամար:
Այդ հաշվեհամարը նա պիտի ներկայացնի տարածքային բաժին, և նպաստը կփոխանցվի այդ բանկային հաշվին: Իսկ եթե անձը չունի բանկի հաշվեհամար, ապա նա կամ նրա փոխարեն դիմում ներկայացնողը դիմումի մեջ նշում է համապատասխան բանկը ու հաշվեհամարը, որի միջոցով շահառուն ցանկանում է ստանալ իր գումարը: Ըստ այդմ՝ գումարը փոխանցվում է համապատասխան բանկին»,-ասաց նա:
Սմբատ Սաիյանի խոսքով՝ դա նշանակում է, որ քաղաքացին կարող է մեկ անգամ ներկայանալ բանկ ու ստանալ իր գումարը:
«Ամսական պարբերականությամբ ձևավորվող վճարման պարբերականությունների փոխարեն անցում է կատարվում ավելի հաճախակի վճարման եղանակին››,- ասաց մասնագետը:
Սմբատ Սաիյանը հիշեցրեց, որ 2016-ի վերջին այս նպաստները ստացող շահառուն այդ դրամագլուխը կարող է օգտագործել սահմանափակ նպատակներով՝ ուսման վարձը վճարելու, սահմանային ու բարձր լեռնային գոտիներում անշարժ գույք ձեռք բերելու, առողջության ապահովության, պետության կողմից սուբսիդավորվող գյուղատնտեսական վարկի մայր գումարի ու տոկոսների մարման նպատակով:
Սաիյանի խեսքով՝ 2015 թվականին ընտանեկան դրամագլուխ ստացող անձանց թիվը կազմել է շուրջ 7800, իսկ 2014-ին՝ 6500:
Զրույցի վերջում, բանախոսը ասաց, որ նպաստ ստանալու համար քաղաքացին պարտադիր պետք է դիմում ներկայացնի.«Սա լրացուցիչ հնարավորություն է 3-րդ ու հաջորդ երեխա ունեցողների համար. վերջիններս կկարողանան սոցիալ-տնտեսական կարիքները, հարցերը լուծելու համար ծախսել նպաստը»:
Սմբատ Սայիյանը հիշեցրեց, որ վճարող մարմինը փոխվում է, ուստի այս ամիս նպաստների տրամադրման ուշացումը՝ 15-20 օր, պայմանավորված է հենց սրանով:
