Դավասում ընթացող միջազգային տնտեսական ֆորումին անդրադարձել են արտասահմանյան պարբերականները: Le Monde-ն գրում է, որ Դավոսում այնքան են մտահոգվում «մոռացված» մարդկանց մասին, որ նույնիսկ պատրաստ են «փախստականի կյանքից մեկ օր» ապրել: Նախկինում Դավոսի սիրելիններ IT ընկերություններն էլ այսօր արդեն մեղադրյալի կարգավիճակում են՝ մեղադրվում են Թրամփի ընտրվելու, կեղծ լուրերի տարածման, համակարգչային կախվածության և այլ մեղքեր կատարելու մեջ:
The Washington Post -ն անդրադարձել է Կանադայի վարչապետ Ջասթին Տրյուդոյի ելույթին, ով օգտագործել է Դավոսի հարթակը հերթական անգամ կանանց իրավունքների համար պայքարը ողջունելու համար: Նա իր խոսքում ասել է, որ աշխարհում կատարվող անկարգությունները պայմանավորված են նրանով, որ արագ փոփոխվող աշխարհում աշխատողները չեն կարողանում կանխատեսել իրենց և իրենց ընտանիքների ապագան: Նա նշել է, որ անհնար է արհամարհել պատասխանատվությունն այն մարդկանց նկատմամբ, ովքեր Դավոսում չեն և երբեք էլ չեն լինի:
Կարմիր խաչի միջազգային կոմիտեի նախագահ Պետեր Մաուրերն էլ փորձել է ուշադրություն հրավիրել դեպի իրականում «մոռացված» մարդկանց և «մոռացված» կոնֆլիկտները՝ մասնավորապես դեպի Կոնգոն:
Հնդկաստանի վարչապետ Նարենդրա Մոդին կարծիքով էլ պետք է համակերպվել այն փաստի հետ, որ գլոբալիզացիան կորցնում է իր գրավչությունը և հարցի կարգավորումը ոչ թե մեկուսացման, այլ հասկանալու և ընդունելու մեջ է պետք փնտրել:
Le Monde-ն էլ գրում է, որ քննադատության կրակ է թափվել տեղեկատվական հարթակում ազդեցիկ դեր ունեցող Google, Apple, Facebook և Amazon IT ընկերությունների վրա:
Նրանց մեղադրել են ամեն ինչում՝ սկսած համակարգչային կախվածությունից, վերջացրած անձնական տվյալների օգտագործամբ և վտանգավոր ծրագրերի ներմուծմամբ:
Հեղինակը գրում է, որ GAFA –ի ղեկավարներն իրենց իսկապես վիրավորված են զգում, երբ նրանց համարում են Թրամփի ԱՄՆ նախագահ ընտրվելու հիմնական մեղավորները:
Edelman ամերիկյան ընկերությունն էլ հայտնել է, որ ամենամյա «վստահության բարոմետր» սոցիալական հարցումների արդյունքներով այս տարի ընկել է սոցիալական կայքերի նկատմամբ վստահության աստիճանը, շատ արևմտյան երկրներում էլ աճել է վստահությունը դեպի ավանդական ԶԼՄ-ներ:
Focus-ն էլ անդրադարձել է այն հարցին, որ այս ֆորումի պատճառով Դավոսի բնակիչները և տուրիստները մի ամսով փախնում են քաղաքից: Օգտվում են միայն այն բնակիչները, ովքեր շքեղ տարածքներ ունեն և կարողանում են վարձակալության տալ դրանք հարուստ հյուրերին, իսկ մնացած բնակիչների համար ֆորումի անցկացումը մի շարք անհարմարություններ և կորուստներ է առաջացնում: Տուրիստներն առհասարակ աշխատում են ամբողջ հունվար ամսին չգալ Դավոս: Ըստ ԶԼՄ-ի, Դավոսի բնակիչների համար այս ֆորումը նման է միջազգային մաֆիայի հավաքույթի, ինչից նրանք ոչ միայն չեն օգտվում, այլ նաև վնասներ են կրում:
