ԱԺ ԵԼՔ խմբակցության պատգամավոր, Լուսավոր Հայաստան կուսակցության անդամ Մանե Թանդիլյանը կարծում է, որ այսօր ընդունվում են օրենքներ, որոնք ավելի ու ավելի են ամրապնդում վարչապետի լիազորությունները, ինչի պատճառով Հայաստանը դառնում է ոչ թե խորհրդարանական, այլ վարչապետական երկիր. «Սահմանադրական ձևափոխվում են և մատուցվում հանրությանն այն տեսքով, որ վարչապետական երկիր ենք դառնում, խորհրդարանական դառնալու փոխարեն»:
Այսօր՝ փետրվարի 19-ին, լրագրողների հետ հանդիպման ժամանակ ԵԼՔ խմբակցության պատգամավորը խոսեց նաև մամուլում շրջանառվող տեղեկությունների մասին, թե ԵԼՔ-ում տարաձայնություններ կան: Տիկին Թանդիլյանը մասնավորպես նշեց, որ դաշինքի մաս կազմող կուսակցությունները տարբեր մոտեցումներ ունեն կոնկրետ խնդիրների մասով, դրա համար բնական է, որ լինում են քննարկումներ, բանակցություններ, առանց որոնց դաշինքում ուղղակի լճացում կլիներ: Այսինքն, այդ քննարկումներն առողջ են, ինչը ողջունելի է:
Պատգամավորը վստահեցրեց, որ դաշինքում ամենատարբեր հարցերի շուրջ միշտ հաջողվում է ընդհանուր հայտարարի գալ՝ նշելով, որ այդպես կլինի նաև այժմ քննարկվող հարցերի մասով:
