Այսօր՝ մարտի 20-ին, Երևանի փոխքաղաքապետ Կամո Արեյանը խորհրդարանում երկրորդ ընթերցմամբ ներկայացրեց «Տեղական տուրքերի և վճարների մասին» օրենքի նախագիծը:
Նախագծով առաջարկվում է պահանջներ սահմանել հատուկ նշանակության հրավառությունների համար: Մասնավորապես խոսքը վերաբերում է այդ հրավառությունների վայրին, խախտումների դեպքում տուգանքի չափերին և այլն:
Այսպիսով, Հայաստանում հրավառությունների իրականացման գործընթացը կարգավորվելու է հատուկ օրենքով:
Արեյանը նշեց, որ առաջին ընթերցումից հետո նախագծում ավելացվել է ԱԺ ԵԼՔ խմբակցության առաջարկությունը: Դաշինքը մասնավորապես առաջարկել էր պայթուցիկ նյութերի վաճառքն արգելել ֆիզիկական անձանց համար: Այսուհետ հրավառությունների համար նախատեսված հրագործական նյութերը կվաճառվեն բացառապես իրավաբանական անձանց կողմից, որոնք ունեն համայնքի ղեկավարի կողմից հատուկ թույլտվություն:
Առանց համայնքի ղեկավարի թույլտվության նման նյութեր վաճառողը, կազմակերպողը ենթարկվում է տուգանքի՝ առաջին անգամ 250 հազար դրամի չափով, երկրորդ անգամ՝ 300 հազար դրամի: