«Մենք ազատամարտի մայրեր շատ ենք ունեցել, բայց քանի որ Վազգեն Սարգսյանը ժողովրդի կողմից ընդունվեց որպես Սպարապետ, Գրետա մայրիկը դարձավ ազատամարտի մայրերի մայրը»,-այսօր՝ մայիսի 21-ին, Վազգեն Սարգսյանի մոր՝ Գրետա Սարգսյանի հուղարկավորության ժամանակ լրագրողների հետ զրույցում նշեց Սպարապետի եղբայրը՝ Արմեն Սարգսյանը:
Սարգսյանի խոսքերով, կռվում, պատերազմի ժամանակ զոհված յուրաքանչյուր զինվորի մայր պատերազմի մայր է:
Հարցին, թե ինչ չէր սիրում Գրետա մայրիկ, Սարգսյանը ասաց՝ անարդարությունը, ստախոսությունը, տղամարդու անպարկեշտ պահվածքը, տղամարդու կողմից ինչ-որ բան խոսք տալը և չկատարելը. «Ընդհանրապես ստի, կեղծիքի հետ չէր կարողանում համակերպվել: Նա մեզ խորհուրդ էր տալիս մնալ ազնիվ, լինել մարդ»: