«ԱՍ արդարադատություն» մրցանակաբաշխության շրջանակներում www.analitik.am-ը ներկայացնելու է նոմինանտների կենսագրությունը, ինչպես նաև հարցազրույց վերջններիս հետ, որի նպատակն է հասարակության անդամներին հնարավորինս շատ տեղեկություն տրամադրել արդարադատության ոլորտի գործիչների վերաբերյալ: Ստորև ներկայացնում ենք Գեղարքունիքի մարզի դատախազ՝ Արսեն Արսենյանի կենսագրությունը:
Կենսագրություն
Արսեն Արսենյանը ծնվել է 1965 թվականի հոկտեմբերի 26-ին Արտաշատ քաղաքում:
1972-1982 թվականներին սովորել և ոսկե մեդալով ավարտել է Արտաշատի թիվ 1 միջնակարգ դպրոցը:
1983 թվականին ընդունվել է ԵՊՀ իրավաբանական ֆակուլտետը:
1984-1986 թվականներին ծառայել է ԽՍՀՄ զինված ուժերում: Զորացրվելուց հետո ուսումը շարունակել է ԵՊՀ իրավաբանական ֆակուլտետում, որն ավարտել է 1990 թվականին և անցել մասնագիտական աշխատանքի:
1990-1999 թվականներին աշխատել է ՀԽՍՀ և ՀՀ ներքին գործերի նախարարությունում՝ քննիչի, ավագ քննիչի, հատկապես կարևոր գործերով ավագ քննիչի պաշտոններում:
1999 թվականից աշխատանքի է անցել ՀՀ դատախազության համակարգում որպես քննիչ, ավագ քննիչ, դատախազ, դատախազության ավագ դատախազ, մարզի դատախազության դատախազի տեղակալ:
2013 թվականի դեկտեմբերի 27-ին ՀՀ գլխավոր դատախազի հրամանով նշանակվել է Գեղարքունիքի մարզի դատախազի պաշտոնում:
Ամուսնացած է, ունի 2 որդի:
-Կա՞ օրենքում բացթողում, որը հնարավորություն է տալիս դատախազին իրեն վերապահված լիազորությունների շրջանակներում օրինական և անկողմնակալ քննությունը կատարելու ընթացքում խախտել իր լիազորությունների սահմանը և կողմնակալություն ցուցաբերել հանցագործության բացահայտմանը:
- Եթե դատախազը ցանկանա խախտել իր լիազորությունների սահմանը և կողմնակալություն ցուցաբերել, չեմ կարծում, որ այնպիսի օրենք լինի, որ ցանկության դեպքում չկարողանա:
-Վերջին հինգ տարիների ընթացքում Հայաստանի Հանրապետությունը հանձնե՞լ է անձանց օտարերկրյա պետություններին:
- Նման տեղեկատվության չեմ տիրապետում:
-Երբ դատախազը հրաժարվում է մեղադրանքից, նման դեպքերում դատավորը պարտավո՞ր է կայացնել արդարացնող դատավճիռ:
-Ոչ:
-Ինչպե՞ս եք գնահատում ՀՀ քաղաքացիների օրինապահության աստիճանը, և արդարադատություն-հասարակություն վստահության չափը:
-Քաղաքացիների օրինապահության աստիճանը 10 բալային համակարգում գնահատելիս գնահատում եմ 6 բալ, իսկ արդարադատություն-հասարակություն վստահությունը՝ 7 բալ:
-Մեր անցկացրած հարցումների արդյունքում պարզվեց, որ հասարակության զգալի հատվածը այդքան էլ համոզված չէ կայացված վճիռների օրինականության հարցում, ինչո՞վ է դա պայմանավորված:
-Դա պայմանավորված է դատարանների կողմից նույնանման հանգամանքներին վերաբերող գործերով իրարամերժ դատական ակտեր կայացնելու պատճառով:
Քվեարկելու համար այցելեք www. p-as.am
