«Մինսկի խմբի ԱՄՆ համանախագահ Ջեյմս Ուորլիքի` Խաղաղության Քարնեգի միջազգային հիմնադրամում ԼՂ հակամարտության կարգավորման վերաբերյալ ելույթն ու Խաղաղության համաձայնագրի նրա առաջարկած վեց կետերը մեծ հաշվով առնչություն չունեն ԼՂ հակամարտության հետ»,- այս մասին այսօր «Անալիտիկ» կենտորնում տեղի ունեցած ասուլիսի ժամանակ ասաց քաղաքագետ Հրանտ Մելիք-Շահնազարյանը:
Խոսելով Ուորլիքի հայտարարության վերաբերյալ Հաաստանի ԱԳՆ Էդվարդ Նալբանդյանի պաշտոնական պատասխանի մասին, նա նշեց. «Զգուշավոր անհամաձայնություն էր, սակայն ես կարծում եմ, որ այն կարող էր լինել ավելի համարձակ: Ես Ուորլիքի հայտարարությունը դիտարկում եմ մեր տարածաշրջանում լրացուցիչ ակտիվության կետեր ստեղծելու սկիզբ:
Այս հայտարարությամբ ԱՄՆ-ն Հարավային Կովկասի իր դաշնակիցներին ցանկանում է հրահրել ավելի ակտիվ գործողությունների, որն էլ կարող է հանգեցնել պատերազմի: Կարող եմ ասել, որ Ուորլիքի հայտարարությունը կարող է լինել տարածաշրջանում պատերազմի վերսկսման պատճառ: Մեր տարածաշրջանում արտաքին գործոնները մեծ նշանակություն ունեն և կարող են ազդել Հայաստան-Ադրբեջան բանակցային գործողությունների վրա, քանի որ Հարավային Կովկասը աշխարհաքաղաքական իմաստով, երբ հայտնվում է հակամարտությունների գոտում, հայտնվում է մեծ վտանգի տակ: Ուկրաինայում հակամարտությունը, որին մենք այսօր ականատես ենք մեր տարածաշրջանի համար մեծ սպառնալիք է: Ցավոք սրտի, հոռետեսական կանխատեսումների առիթ են տալիս այնտեղ տեղի ունեցող զարգացումները: Քաղաքացիական պատերազմն այնտեղ արդեն իրականություն է, և նոնսենս է, երբ ՌԴ-ի քթի տակ մորթում են ռուսներին»:
Հարցին՝ արդյոք հնարավոր է Ռուսաստան-Թուրքիա տնտեսական համագործակցությունը վերածվի քաղաքական համագործակցության, նա պատասխանեց. « Թուրքիան և Ռուսաստանը այս ոլորտում ավելի շատ մրցակիցներ են և այդ պատճառով էլ նրանց միջև չի կարող լինեն համագործակցություն»:
Խոսելով Մինսկի խմբի մեր տարածաշրջանում նշանակության ու դերի մասին, նա նշեց. «Մինսկի խումբը 20 տարի շարունակ կարողացել է պահպանել խաղաղությունը տարածաշրջանում: Այն արտաքին ազդեցություններց մեր տարածաշրջանը պաշտպանող զսպաշապիկ է: Մինսկի խումբը ավելի շատ քաղաքական ակումբ է, որտեղ գերտերությունները համաձայնեցնում են իրենց գործունեությունները մեր տարածաշրջանում: Այստեղ ԱՄՆ- ՌԴ շահերը համընկնում են»:
Խոսելով ՀՀ-ում ՌԴ դեսպան Իվան Վոլինկինի վերջերս արած հայտարարության մասին, նա ասաց. «Կարծում եմ, որ մեր ԱԳՆ պատասխանը այս հայտարարության վերաբերյալ համոզիչ էր: Պետք է նշեմ, որ որևէ քաղաքական հայտարարություն չի կարող սեպ լինել երկու պետությունների հարաբերություններում: Այս հայտարարությամբ ՀՀ-ում ՌԴ դեսպանը ընդամենը բացասական արդյունքների հասավ: Նա իր այս սխալ քայլից պետք է դասեր քաղի և այլևս չփորձի այսպիսի հայտարարություններ անել»: