«Թե արտաքին, թե ներքին քաղաքական առումներով քառօրյա պատերազմը բավականին լուրջ ցնցում էր Հայաստանի քաղաքական դաշտի համար»,-այսօր՝ ապրիլի 28-ին, «Անալիտիկ» մամուլի ակումբում լրագրողների հետ հանդիպման ժամանակ ասաց քաղտեխնոլոգ Կարեն Քոչարյանը՝ պատասխանելով այն հարցին, թե ինչ իր հետ բերեց ապրիլյան քառօրյա պատերազմը և հավելելով, որ նույնը չի կարելի ասել հասարակության մասին, քանի որ բոլորը տեսան, թե ինչ աննախադեպ համախմբում տեղի ունեցավ, որը, երևի թե, անսպասելի էր քաղաքական հատվածի համար:
Ըստ փորձագետի, հիմա ստեղծվել է մի իրավիճակ, երբ հասարակությունը կոնկրետ խնդիրներ է դնում իշխանության և քաղաքական դաշտի առջև. «Եթե քաղաքական հատվածը չհասցնի հասարակության հետևից, կարծում եմ՝ այսօր գոյություն ունեցող քաղաքական իրողությունը կփոխարինվի նորով: Քաղաքական հատվածն արդեն հասկացել է դա, և արդեն ինչ-որ քայլեր արվել են: Ճիշտ է՝ արվածը քիչ է, բայց, այնուամենայնիվ, կա: Պետք է ասել նաև, որ հասարակության արձագանքից երևում է՝ պահանջ կա, մարդիկ ցանկանում են շարունակությունը տեսնել, ընդ որում, շատ արագ: Այսինքն՝ մենք սպասելու, դանդաղ շտապելու ժամանակ չունենք: Ժամանակ չունեն առաջին հերթին իշխանությունները»:
«Հասարակությունը հասկացել է, որ նույնիսկ այն, ինչի համար շատ դեպքերում լռել է, այն մակարդակին չէ, որում պետք է լիներ: Այո, մեր տղաները դուխով են...Լավ է, որ մեծացել է պատերազմ չտեսած սերունդ, որը պատրաստ է այս պետության ամեն թիզի համար զոհվել...»,-հավելեց քաղտեխնոլոգը:
Խոսելով արտաքին քաղաքականության մասին՝ Քոչարյանն ասաց, որ այստեղ ևս լուրջ իրադարձություններ տեղի ունեցան. «Մենք տեսանք, թե ինչպես ԵԱՀԿ Մինսկի խումբը, որը պետք է լիներ 1994 թվականի զինադադարի ռեժիմի երաշխավորողը, չկարողացավ անել իր գործը: Դրան մեր իշխանությունները, իմ կարծիքով, բավականին ադեկվատ պատասխան տվեցին: Ընդ որում, ես խոսում եմ այն պատասխանի մասին, որը տրվեց բոլոր կողմերին՝ ռուսներին, ֆրանսիացիներին, ամերիկացիներին: Մեր քաղաքական էլիտան փորձեց հասկացնել, որ երաշխիքի բացակայության դեպքում հայկական կողմը կարող է ջնջել գոյություն ունեցող ֆորմատը և բոլորին ստիպել սկսել նոր ֆորմատ: Առայժմ դա ընթացքի մեջ է, և ես կարծում եմ՝ մենք արդյունքները կտեսնենք»,-ասաց փորձագետը՝ հավելելով, որ արտաքին քաղաքական հարցերով դեռ զարգացումներ են ընթանում և այս պահին ինչ-որ բան չարժի ասել. «Ամեն դեպքում, կարծում եմ, որ այստեղ էլ կլինեն ինչ-որ դրսևորումներ, որոնք եղան ՊՆ-ում, քանի որ արտաքին քաղաքականության պատասխանատուները վստահեցնում են, որ ինչ-որ բաներ են անում, ուղղակի իրենց գործն անտեսանալի է, բայց գոնե ես մինչև այս պահը որևէ բան չեմ տեսել»:
Ներքին քաղաքական կյանքի փոփոխությունների մասին խոսելով՝ Քոչարյանն ասաց, որ այստեղ շատ բան փոխվեց պատերազմից հետո. «Նախ շատ օլիգարխներ, չինովնիկներ փոխել են իրենց տոնը: Իհարկե, անպատժելիության մթնոլորտը կա, այն չի վերացել, բայց ամեն ինչ մի քիչ այլ է: Վերջիններս հասկացել են, որ հասարակության համախմբվածությունը կարող է ամեն պահի շուռ գալ հենց իրենց դեմ: Որևէ մեկը չի կարող ասել, թե ինչ կլինի սխալ քայլից հետո, դրա համար, բոլորը շատ զգույշ են:
Պետք է ասեմ, որ փոփոխություններ եղան նաև ընդդիմադիր դաշտում գտնվողների ուժերի հարաբերակցության մեջ: Մասնավորապես, դաշտում բավականին մեծացավ ՀԱԿ-ի կշիռը, և դա տեղի ունեցավ առաջին և գործող նախագահների հանդիպումից հետո»:
Լրագրողներից մեկի այն հարցին, թե ինչ կարելի է ասել Վարդան Օսկանյանի կուսակցության մասին՝ փորձագետն ասաց, որ կարծիք հայտնելու համար դեռ վաղ է, քանի որ դեռ շատ քիչ բան է հայտնի այդ ուժի մասին: