ՍԴ նախագահ Հրայր Թովմասյանի տանը խուզարկությունը դեռ շարունակվում է:
Քիչ առաջ այստեղ եկավ իրավապաշտպան Ռուբեն Մելիքյանը, ով ասաց, որ որևէ կերպ ներգրավված չէ գործում, եկել է զուտ հասկանալու համար իրավիճակը. «Ես սա համարում եմ անընդունելի, ապօրինի: Կարծում եմ, որ այս գործողությանը կտրվի նաև քրեաիրավական գնահատական»:
Հարցին, թե ինչու է նման գնահատական տալիս, եթե խուզարկությունը կատարվում է հարուցված գործի շրջանակներում, Մելիքյանը նշեց, թե շատ հեշտ է ասել, որ այստեղ քրեական հարուցված գործ կա․ «Ես՝ որպես իրավաբան ու իրավապաշտպան, ասեմ՝ այն բոլոր դեպքերում, երբ կա հարուցված քրեական գործ, բոլոր քննչական գործողությունները, բոլոր սահմանափակումները պետք է իրավաչափ լինել: Ինչպես եք պատկերացնում, քրեական գործի փաստը թույլ է տալու ցանկացած ապօրինությո՞ւն»:
Դիտարկմանը, որ դատարանի որոշում կա, իրավապաշտպանն ասաց, որ դրան ժամանակի ընթացքում տրվելու է քրեաիրավական գնահատական. «Ես կարծում եմ, որ դատարանն ապօրինի որոշում է կայացրել»:
Մելիքյանի խոսքերով, երեք պատճառ կա, որոնք վկայում են դատարանի ապօրինի որոշման փաստը. «Քրեադատավարական տեսանկյունից, եթե խոսքը վերաբերեր այնպիսի ենթադրյալ հանցագործությանը, որտեղ ողջամտորեն կարելի էր ենթադրել, որ բնակարանում կարող է ինչ-որ բան տեղի ունենալ, կարող էր քննարկվել:
Այստեղ մենք գործ ունենք այնպիսի ենթադրյալ հանցագործության հետ, որի պարագայում բնակարանում որպես այդպիսին հանցանշաններ հայտնաբերելն անտրամաբանական է: Երկրորդ՝ այս պատմության սկզբից անցել է մոտ 25 օր: Քննչական տակտիկայի տեսանկյունից տրամաբանական չէ մտածել, թե բնակարանում հնարավոր է ինչ-որ բան հայտնաբերել: Երրորդ՝ ես ուզում եմ ընդգծել, որ մենք գործ ունենք ՍԴ գործող նախագահի հետ, կա իրավիճակ, երբ դատարանը նման գործողության թույլտվություն է տվել հնարավոր է այնպիսի պայմաններում, երբ մեկ այլ դատարան մերժել է: Օրեր առաջ մենք տեսանք, որ դատարանի թույլտվությունը ստանալու հայտ է ներկայացվել, որը մերժվել է»։
Մելիքյանի խոսքերով, այն ինչ այսօր կատարվում է, քաղաքական հետապնդման շարունակություն է. «Եթե իսկապես եղել է խուզարկության համար դատարանի որոշում ստանալու մեկ այլ փորձ, որը մերժվել է, սա շատ ավելի է լրջացնում իրավիճակը: Դա նշանակում է, որ որևէ մեկս պաշտպանված չենք»:
