Գլխավոր Իրավական Տեսանյութեր 

Ինչ են փնտրում քննիչները Հրայր Թովմասյանի տանը

Ես չգիտեմ, թե ինչ են փնտրում քննիչները: Իմ գնահատմամբ փնտրում են ինչ-որ աղաղակող բան, որպեսզի հանրությանը կարողանան մատուցել այս պրոցեսի իրական լինելը: Այս պահին նման բան չեն գտել: Լրագրողների հետ զրույցում հայտարարեց ՍԴ նախագահ Հրայր Թովմասյանի պաշտպաններից Միհրան Պողոսյանը՝ խոսելով իր պաշտպանյալի տանն ընթացող խուզարկության մասին:

Ինչ վերաբերում է ՀՔԾ պարզաբանմանը, Պողոսյանն ասաց, որ ՀՔԾ-ն լավ կանի, եթե բավարարի միջնորդությունը՝ տեղի ունեցող իրադարձությունները տեսաձայնագրելու մասով. «Այդ ժամանակ իրականությունն ակնհայտ կլիներ, որ քննիչը պարոն Թովմասյանին չի ծանոթացրել որոշումը»:

Դիտարկմանը, որ քննիչը բարձրաձայն կարդացել է որոշումը, Պողոսյանը նշեց, որ դա ծանոթացում չէ. «Բնակարանում խուզարկություն կատարելուց առաջ պետք է որոշման հետ ծանոթացնեն մասնակիցներին ու այն անձին, ում տանը կատարվում է խուզարկությունը: Մենք այս պրոցեսի պարագայում քննիչի նկատմամբ որևէ վստահություն չունենք: Որոշումն ամբողջությամբ չի ընթերցվել, քննիչն արտաբերել է իր նախընտրած արտահայտությունները, ես չգիտեմ դրանք եղել են որոշումից, թե՝ ոչ: Ես ցանկանում էի հավաստիանալ՝ քննիչի ընթերցածն իրականությանը համապատասխանում է, թե՝ ոչ: Սակայն նա որոշումը վերցրեց ու արգելեց»:

«Խուզարկության որոշմանը պարոն Թովմասյանը չի ծանոթացել, իսկ ես ամբողջությամբ չեմ ծանոթացել: Ծանոթանալը քրեական դատավարության օրենսգրքով սահմանված կարգով և իրավաբանական պրակտիկայում անձի նախընտրելի տարբերակով ծանոթանալն է: Նույն ՀՔԾ-ի նույն քննիչների բոլոր այլ քրեական գործերով ծանոթացումը կատարում են կամ պատճենը տրամադրելով, կամ թույլատրելով նկարել: Եթե այս դեպքում նման գործողությունն արգելվում է, արդեն խոսքը վերաբերում է խտրական վերաբերմունքին, ինչն էլ խոսում է Թովմասյանի նկատմամբ իրականացվող  քաղաքական հետապնդումների մասին»:

Պողոսյանը նշեց, որ խուզարկության վերաբերյալ որոշումը կարող են բողոքարկել միայն դրա պատճենն ունենալուց հետո. «Բողոքարկելու համար հիմնավորումները պետք է նշվեն: Այս պահին՝ ոչ, սակայն այս օրվա մեջ կարող ենք անել դա»:

Այս պահին խուզարկությունը դեռ շարունակվում է, թե որքան այն կտևի, Պողոսյանը չգիտի:

  •  
  •  
  •  
  • 1
  •  
  • 1
  •  
  •  
  •  
    2
    Shares

Նույն շարքից