Այսօր «Անալիտիկ» կենտրոնում տեղի ունեցած «Այս աշնանը Երևանում կբացվի «Քարֆուր» հիպերմարկետը: Ի՞նչ ազդեցություն կունենա այն Հայաստանում գործող սուպերմարկետների գործունեության և հայ սպառողի գրպանի վրա» թեմայով ասուլիսի հյուրերն էին Հայաստանի սպառողների ասոցիացիայի նախագահ Արմեն Պողոսյանը և Հայրենական ապրանք արտադրողների միության նախագահ Վազգեն Սաֆարյանը:
Վազգեն Սաֆարյանը խոսելով, թե «Քարֆուր» հիպերմարկետը ի՞նչ ազդեցություն կունենա Հայաստանում գործող սուպերմարկետների և փոքր ու միջին առևտրային կենտրոնների վրա, ասաց. « «Քարֆուր» հիպերմարկետի գործունեությունն Հայաստանում ունի և՛ դրական, և՛ բացասական կողմ: Առևտրի այս ձևը ավելի քաղաքակիրթ է և ավելի մատչելի գներ կլինեն ապրանքների համար: Սակայն «Քարֆուրը» կարող է վատ անդրադառնալ տեղական որոշ արտադրանքնրի արտադրության վրա: Այդ պատճառով կառավարությունը պետք է լրացուցիչ միջոցներ ձեռնարկի, որպեսզի տեղական ապրանքները ավելի մատչելի լինեն և իրացվեն սպառողների կողմից: Մենք պետք է չմոռանանք տեղական արտադրողի շահերը: Հայկական կողմը «Քարֆուրի» հետ պետք է բանակցի, որպեսզի մեր ապրանքները նույնպես արտահանվեն Ֆրանսիա: Մեր պատրաստի արտադրանքը հիմնականում Ռուսաստան ենք արտահանում, այն դեպքում, որ ֆրանսահայերը կուզենային օգտագործել հայկական արտադրության ապրանք, քանի որ մեր ապրանքների որակական և համային հատկությունները էկոլոգիապես շատ բնորոշ են մեր օրգանիզմին: Օրինակ՝ մեր լոլիկը, մեր վարունգը ավելի լավն ու համեղ են, քան այլ երկրներում արտադրվածները:
Բանախոսը նաև նշեց, որ «Քարֆուրը» կարող է վատ անդրադառնալ փոքր և միջին առևտրային կենտրոնների վրա. «Երբ Երևան Սիթի առևտրային կենտորնները սկսեցին գործել, շատ փոքր առևտրային կենտրոնների գործունեությունը դադարեց»:
Սաֆարյանը շեշտեց, որ պետք է հավասարակշռել արտադրողի շահերն ու սպառողի շահերը, ձեռքբերումներն ու օգուտները:
Հայաստանի սպառողների ասոցիացիայի նախագահ Արմեն Պողոսյանը նունպես կարծում է, որ «Քարֆուր» հիպերմարկետի մուտքը Հայաստան ունի և՛ դրական և՛ բացասական կողմեր: Շատ դրական երևույթ է, քանի որ ֆրանսիական տեխնոլոգիան Հայաստան է ներմուծվելու, քանի որ «Քարֆուրը» ժամանակակից լավագույն տեխնոլոգիան է և իր հեղինակությամբ երկրորդը աշխարհում. «Այն ավելի քաղաքակիրթ, որակյալ և մատչելի առևտուր անելու հնարավորություն է տալիս հայ սպառողին, քանի որ տոնավաճառները, փողոցային առևտուրը, որոնք այժմ գործում են միջնադարյան առևտրային ձևեր են: Սակայն այն բացասականորեն կանդրադառնա փոքր ու միջին առևտրային կենտրոնների վրա: Այսօր մենք ունենք քաղաքաշինության խնդիր, քանի որ մեր ճարտարապետները կարծում են, թե կառուցապատել նշանակում է «կառույցով պատել», սակայն նրանք պետք է ահսկանան, որ դա այդպես չէ՝ տարածության մեջ սուպերմարկետները պետք է ճիշտ տեղադրված լինեն, որպեսզի միջին և փոքր առևտրային կենտրոնները չմեռնեն»:
Հարցին՝ «Քարֆուր» հիպերմարկետի մուտքը ինչպե՞ս կազդի հայ սպառողի գրպանի վրա, բանախոսը պատասխանեց. ««Քարֆուր» հպերմարկետը կխթանի մրցակցությունը, իսկ վերջինս միշտ էլ էժանացում է բերում : Կարծում եմ, որ սպառողի գրպանի վրա դրականորեն կանդրադառնա»: