«2011 թվականից Երևանում կազմակերպվում են տոնավաճառներ, որոնց թիվը տարեց տարի ավելանում է: Այս տարի՝ հունիսի 8-ին, Կասյան փողոցի հարակից տարածքում, կմեկնարկի տոնավաճառը: Մեկնարկը կլինի հանդիսավոր և կուղեկցվի տոնական միջոցառումներով: Այս տարի նույնպես տոնավաճառները կազմակերպվելու են նույն սկզբունքով՝ լինելու են հարմարավետ վրաններ , հարմար գներ և առանց միջնորդների գյուղամթերքը բնակիչներին է վաճառվելու: Այն տևելու է մինչև տարեվերջ, իսկ վերջին 10 տոնական օրերին լինելու է շուրջօրյա: Գործելու է համապատասխան կայք, որպեսզի ցանկացած անձ հնարավորություն ունենա տեսնել, թե ի՞նչ ապրանք է վաճառվում»,-այս մասին այսօր «Անալիտիկ» կենտրոնում տեղի ունեցած ասուլիսի ժամանակ ասաց ՀՀ գյուղատնտեսության փոխնախարար Ռոբերտ Մակարյանը:
ՀՀ գյուղատնտեսության փոխնախարարը խոսելով անցած տարվա տոնավաճառի մասին, ասաց, որ այն նույնպես մեկնարկել էր հունիսի 8-ին՝ Կասյան փողոցի հարակից տարածքում, և կազմակերպվել էր 4 տոնավաճառ:
Նա հայտնեց, որ բոլոր մարզերից մասնակիցներ են լինելու, անցած տարի Արցախից նույնպես մասնակից է եղել, այս տարի ևս լինելու է:
Հարցին, թե ինչպե՞ս գյուղացին կարող է մասնակցել տոնավաճառին, Ռոբերտ Մակարյանը պատասխանեց. «Տոնավաճառին մասնակցել ցանկացող գյուղացին գրանցվում է գյուղատնտեսության աջակցության մարզային կենտորնում , մեր մասնագետները համոզվում են, որ ունի հողատարծք, զբաղվում է գյուղատնտեսությամբ, տրվում է սերտիֆիկատ, այնուհետև հեռախոսով գյուղացուն տեղեկացնում են նրա մասնակցության մասին»:
Հարցին՝ արդյոք տոնավաճառը չի հեշտացնում վերավաճառողների գործը, փոխնախարարը պատասխանեց, որ նման մտավախություն գյուղատնտեսության նախարարությունը չունի. «Մենք հետևում ենք գներին, մոնիթորինգ է իրականացվում և աշխատում ենք ամեն ինչ անել, որպեսզի գյուղացին առանց միջնորդի ապրանքն իրացնի և եկամուտ ստանա: Շուկայում գործող գները գյուղացիներին է տրամադրվում, որպեսզի նրանք ծանոթ լինեն շուկային»:
Հարցին՝ արդյոք տոնավաճառ կազմակերպելը հետամնաց գործ չէ, փոխնախարարը պատասխանեց. «Եվրոպական զարգացած երկրներում այսպիսի տոնավաճառներ նույնպես գործում են, մենք հետամնաց գործ չենք ձեռնարկել: Նշեմ, որ կառավարության ծրագրում կա մեծածախ շուկաների զարգացման վերաբերյալ կետ, որոնք մեծ ներդրումներ են պահանջում, կարծում եմ, որ մենք շուտով նույնպես կունենանք: Մոտ ապագայում Ռուսաստան կարտահանվի 23.000 տոննա բանջարեղեն: Նաև աշխատանքներ են իրականացվում վերամշակող գործարանների, կազմակերպությունների հետ, որպեսզի պարզ լինի, թե ո՞ր կազմակերպությունը որքա՞ն գյուղմթերք է մթերում»:
ՀՀ գյուղատնտեսության փոխնախարարը նաև տեղեկացրեց, որ շուտով միս վերամշակող կազմակերպությունների միություն կլինի, այնուհետև կստեղծվեն գյուղամթերք արտադրող միություններ. «Նաև արտահանման ապահովագրական ընկերություն է հիմնադրվել, որի նպատակը արտահանման խթանումն է: Գյուղնախարարությունը աշխատում է բոլոր արտահանողների հետ: Պարզ է, որ արտահանման համար ապրանքը պետք է ունենա համապատասխան որակական հատկանիշներ և մրցունակ լինի արտաքին շուկայում, այդ իսկ պատճառով գյուղատնտեսային շատ ապրանքներ չեն արտահանվում:
Խոսելով այս տարի ծիրանի արտահանման ծավալի մասին, նա նշեց. «Ծիրան կլինի, այս տարի 10.000 տոննա ծիրանի բերք ենք սպասում: Հնարավոր է նաև արտահանում, ուղղակի ծավալները քիչ կլինեն»,-եզրափակեց փոխնախարարը:
