Այսօր՝ հունվարի 23, լրագրողների հետ հանդիպման ժամանակ փորձագետ, ԱԺ նախկին պատգամավոր Թևան Պողոսյանը, խոսելով Ադրբեջանին ռուսական զենքի հերթական քանակի վաճառքի մասին և այն մասին, թե արդյո՞ք ուժերը կբալանսավերվեն, եթե Հայաստանը վերջին վարկային պայմանագրով զենք ձեռք բերի Ռուսաստանից, ասաց, որ պետք չէ ուղղակի գնալ մեկին-մեկ զենք գնել: Պետք է հասկանալ, թե ինչ ունի Ադրբեջանը:
Նրա խոսքերով, շարքային քաղաքացիները չեն կարող իմանալ, թե ինչ զենք ունի Ադրբեջանը, սակայն մեր հատուկ ծառայությունները պետք է իմանան դա և ըստ դրա էլ պետք է հասկանալ, թե ինչ զենք պետք է ձեռք բերել: Եթե ամեն ինչ ճիշտ արվի, Պողոսյանի խոսքերով, Երևանը կարող է ոչ միայն բալանսավորել, այլ նաև մի բան էլ առաջ անցնել:
ԱԺ նախկին պատագամավորը նշեց, որ տրված վարկով չի պարտադրվում ինչ-ինչ տեսակի զենքեր գնել, սահմանափակումներ չկան:
Ասուլիսին ներկա քաղաքագետ Ստեփան Գրիգորյանն էլ բարձրացրեց այն հարցը, թե ինչու է Ռուսաստանը ներում այլ երկրների պարտքերը, սակայն դա չի անում Հայաստանի մասով:
Պարոն Գրիգորյանը մասնավորապես նշեց, որ Ռուսաստանն օրեր առաջ ներեց Ղրղզստանի 250 միլիոն դոլարի պարտքը: Բացի դրանից, այն ժամանակ, երբ Ղրղզստանը միացավ ԵԱՏՄ-ին, Ռուսաստանն այդ երկրին տրամադրեց 1 միլիարդ 250 միլիոն դոլարի վարկ:
Քաղաքագետը նշեց, որ Ռուսաստանը ներեց նաև Կուբայի 8 միլիարդ վարկը, Սիրիայի՝ 20 միլիարդ: Գրիգորյանն ասաց, որ պետք է հասկանալ, թե ինչու են մյուսներին ներում, իսկ Հայաստանից վերցնում պարտքի դիմաց:
Պետք է անհրաժեշտ քայլեր ձեռնարկել, որպեսզի այս զենք գնելու համար վերցված վարկի դիմաց էլ Ռուսաստանն ինչ-որ բան չվերցնի Հայաստանից: