Աշխարհի փոփոխվող պայմաններին հարմարվում են բոլոր ոլորտները: Հաշվի առնելով կլիմայական գլոբալ խնդիրները, տնտեսական ցուցանիշները և մի շարք այլ հանգամանքներ աշխարհի որոշ երկրներ գործուն քայլեր են ձեռնարկում էլեկտրոէներգիայի այլ աղբյուրներ զարգացնելու և կիրառելու համար: Ներկայացնենք մի քանի երկիր, որոնք ծրագրում են անցնել մաքուր էներգիայի օգտագործմանը: Այսպես՝
2018-ից սկսած Ֆինլանդիայում արգելվում է էլեկտրական էներգիայի արտադրության համար ածուխի օգտագործումը: Նախատեսվում է,որ 2030-ին Ֆինլանդիան ամբողջովին կհրաժարվի այս նպատակով ածուխի օգտագործումից:
Իրանը պլանավորում է ամեն տարի վերականգնողական էներգիայի աղբյուրներ կառուցել:
Նիդեռլանդները 2,4 ԳՎ-ից ավել հզորության արևային էլեկտրակայաններ են կառուցելու:
Կանխատեսումների համաձայն Չինաստանը մինչև 2030 թվականը էներգիայի ստացման համար օգտագործվող 300 մլն. տոննա ածուխը կփոխարինի էներգիայի այլ աղբյուրներով: Այս դեպքում Չինաստանը կկարողանա խնայել ՀՆԱ-յի 1%-ի չափով գումար՝ արևի և քամու էներգիան օգտագործելու շնորհիվ:
Ճապոնիան ամբիցիա ունի դառնալ աշխարհի ջրածնային մայրաքաղաք: Այս նպատակին հասնելու համար առաջարկվում է ջրածնային հիմքով վառելիքային մարտկոցներ ստեղծել: Այդ մարտկոցներով աշխատող մեքենաների և ավտոբուսների թիվը Ճապոնիան ձգտում է մինչև 2030 թվականը հասցնել 800 հազարի: Սրա համար Ճապոնիան ձգտում է իջեցնել ջրածնային մարտկոցներով աշխատող մեքենաների գները՝ մի հատի արժեքը հասցնելով 18 000 ԱՄՆ դոլարի, ինչպես նաև ավելացնել ջրածնային լիցքավորման կայանների թիվը: Ջրածնային մեքենաների արտադրությամբ հետաքրքրված են Տոյոտան և Հոնդան:
ԱՄՆ-ում վերականգնողական էներգիայով մեծապես հետաքրքրված են Կալոֆորնիա նահանգում: Պորտլենդը նույնպես ցանկանում է մինչև 2035 թվականը վերականգնողական էներգիայի աղբյուրներով բավարարել բնակչության էլենտրաէներգիայի պահանջները, իսկ 2050-ին վերջնականապես հրաժարվել ածխաջրածնային աղբյուրներից:
Հնդկաստանն ավելացնում է արևային էներգիայի կայանները և նպատակ ունի մինչև 2022 թվականը հասնել տարեկան 100ԳՎ արևային էներգիայի արտադրության:
Ավստրալիան աշխարհում առաջին երկիրն է, որ դեռևս տեքստային տարբերակով, բայց թողարկել է թվային էներգետիկ բիրժա: Այստեղ արևային էներգիա արտադրողները վաճառում են իրենց ավելացած էներգիան և նույնիսկ միավորվում միմյանց հետ՝ ստեղծելով վիրտուալ էլեկտրակայաններ:
Փորձագետների տվյալներով, այս պահին Ավստրալիայում տեղադրված է 6750 արևային մարտկոց՝ յուրաքանչյուրը մինչև 5ԿՎ հզորության, որոնք արտադրում են ամբողջ էլեկտրականության 16%-ը:
Ստեղծված բիրժան ապակենտրոնացված է: Այն թույլ է տալիս էլեկտրոէներգիա արտադրողներին մուտք ունենալ ինչպես շուկա, այնպես էլ շփվել հաճախորդների հետ: Ալգորիթմն ավտոմատ կերպով ընտրում է էներգիայի մոտակա աղբյուրը, եթե տեսնում է էլէներգիա գնելու հայտ:
2017 թվականին Սաուդյան Արաբիայի Էներգետիկայի նախարարը հայտարարեց, որ վեց տարվա ընթացքում երկիրն իր էլեկտրաէներգիայի պահանջի 10%-ը կբավարարի վերականգնողական էներգիայի աղբյուրներով: Այս նպատակի իրագործման համար երեք տասնյակ նախագծեր պետք է իրականացվեն, 10ԳՎ հզորության արևային և քամու էներգիայի կայաններ կառուցվեն:
Սաուդյան Արաբիան հայտարարել է, որ ստեղծելու է վերականգնողական էներգիայի աղբյուրների զարգացման աշխարհի ամենագրավիչ, մրցունակ և լավ կազմակերպված պետական ծրագիրը: