Այսօր՝ մարտի 23-ին, Աննա Հակոբյանը կորոնավիրուսի կանխարգելման մասին բուկլետներ է բաժանել քաղաքացիներին:
Լրագրողների հետ զրույցում Հակոբյանն ասել է, որ որպես կամավոր է դա անում, ցանկանում է իր լուման ներդնել քաղաքացիներին իրազեկելու գործում:
Հակոբյանը հայտարարել է, որ իր դեմքով տարածելը կարևոր է. «Բուկլետներն այն մասին են, թե ինչպես պետք է մեկուսանալ, ինչ անել այս պայմաններում»:
Վարչապետի կինը հայտարարել է, որ այսօր, ըստ էության, ինքմամեկուսացումից հետո առաջին օրն է դուրս գալիս, մի անգամ ամուսնու հետ խանութ է գնացել ու վերջ. «Այսօր մի պահ նորից քայլեցի փողոցում: Բոլորը շատ ուշադիր էին, գրկախառնության փորձեր չեղան, ուղղակի հեռավորության վրա ողջունում էինք, իրար առողջություն էինք մաղթում»:
Հակոբյանի խոսքերով, քաղաքացիները լրջությամբ են վերաբերում այն ամեն ինչին, ինչն ասվում է, վարքագծի կանոններին շատ լուրջ են վերաբերվում. «Քաղաքացիների աջակցությունը շատ կարևոր է, հակառակ դեպքում կառավարության ջանքերն արդյունք չեն ունենա»:
