Հացի արտադրության տեխնոլոգիայով զբաղված գիտնականներն ու սպառողների շահերի պաշտպան կազմակերպությունները տարբեր կարծիքներ ու տեսակետներ ունեն «Ցորենի ալյուրի հարստացման մասին» ՀՀ օրենքի նախագծի` հացի խմորի մեջ օգտագործվելիք հավելանյութերի վերաբերյալ: Հայտնի բան է, որ հացի արագ խմորման համար օգտագործվում են ոչ օգտակար հավելումներ, իսկ սև հաց ստանալու համար էլ՝ տարբեր ներկանյութեր:
ՀՀ սպառողների ազգային ասոցիացիայի նախագահ Մելիտա Հակոբյանը խնդրի հետ կապված` Analitik.am-ի հետ զրույցում չցանկացավ որևէ պարզաբանում տալ` նշելով, որ նախագիծն առայժմ քննարկման փուլում է. «Վերջնական եզրակացության կգանք, երբ տեխնիկական գիտությունների թեկնածու Արամ Նազարյանի գլխավորությամբ կազմված հանձնաժողովի կողմից կքննարկվի հարցը: Այդ ժամանակ նոր կարող ենք հայտարարությամբ հանդես գալ և տեղեկացնել` որքանով է այն օգտակար կամ վնասակար»:
«Գրիգոր Նարեկացի» բժշկական կենտրոնի վիրաբույժ Գագիկ Փիրուզյանը հավաստիացրեց, որ, այո՛, սննդում ցանկացած դեղամիջոցի չարաշահումը, ինչպես նաև երկաթ պարունակող նյութերը, մարդու մոտ կարող են առաջացնել առողջական խնդիրներ: Ինչ վերաբերվում է ալյուրի մեջ երկաթի հավելանյութ ավելացնելուն, վերջինս հույս հայտնեց, որ ամեն ինչ չափավոր կլինի: «Այդ նյութերը եթե չափավոր օգտագործվեն, վտանգ չի լինի»,-ասաց նա: Մասնագետը չցանկացավ «խառնվել» Կառավարության գործերին, ուստիև դժվարացավ պատասխանել մեր հարցերին` նշելով, որ նա, բնականաբար, «գիտի ինչ է անում». «Կառավարությունը նախապես ամեն ինչ հաշվարկել է, և հաստատ, հենց այնպես, ավելորդ գումար չէր ծախսի դրա վրա»,-ասաց վիրաբույժը: Հարցին` թե, այնուամենայնիվ օրգանիզմում ինչ խնդիրներ կարող են առաջանալ երկաթի ավելցուկից, ասաց, որ այն կարող է հանգեցնել հիպերտոնիայի, ազդել ճնշում ունեցող մարդկանց, հղիների առողջության վրա:
«Սպառողների ասոցիացիա» հասարակական կազմակերպության նախագահ Արմեն Պողոսյանն ավելի հեռվից սկսեց հարցի վերաբերյալ իր պարզաբանումը.«Այսօր Հայաստանում գոյություն ունի թերսնուցման երևույթ` կապված երկրի սոցիալ-տնտեսական ծանր իրավիճակի հետ: Ասում են՝ այդ երևույթը 19 տոկոս է կազմում (դրանք ֆիզիկական և մտավոր անառողջ մարդկանց թիվն է , որին ես շատ կասկածում եմ ): Մարդիկ այսօր այս վիճակում ապրում են զրկված նույնիսկ նորմալ սնունդից. մատչելի չէ հավը, ձուկը, միրգը...իսկ բժշկությունը գտել է ձևը` ալյուրը հարստացնել երկաթով»: Մեր հաջորդ հարցին` թե շատ մասնագետներ և բժիշկներ պնդում են, որ այնուամենայնիվ , ոչ միայն երկաթի պակասն է վնասակար, այլև ավելցուկը, պարոն Պողոսյանը նկատեց.«Այդ մարդիկ բժիշկներ չեն, եթե նույնիսկ նրանց գրպանում դիպլոմ կա, դա դեռ ոչինչ չի նշանակում»:
Analitik.am-ը իր զրուցակցին ուղղեց հաջորդ հարցը` հացը վիտամինացվելու դեպքում, բնականաբար, կթանկանա այն, ինչ են անելու մարդիկ, չէ՞ որ 33 տոկոս աղքատության դեպքում, երբ գրեթե բոլոր ապրանքները թանկացել են և դեռ թանկանալու են, երբ ապրելն անչափ դժվարացել է, հիմա էլ հացի համա՞ր պետք է հավելյալ գումար վճարեն, պարոն Պողոսյանը հուսադրեց, որ թանկացումը չնչին է լինելու` 1-2 դրամ :
Այնուամենայնիվ, ինչո՞ւ կառավարությունը չի հրահանգում գովազդել և պրոպագանդել բնական հացի արտադրությունը և փոխարենը լծվել է այն հավելանյութերով հարստացնելու գործին, «Սպառողների ասոցիացիա» ՀԿ-ի նախագահը արձագանքեց. «Շատ ճիշտ նկատեցիք, շատ ճիշտ հարց էր, ես Ձեզ հետ լիովին համաձայն եմ…Գիտեք, նույնիսկ իմ տանը չեմ կարողանում նախընտրել սև հաց, 20 տարի է ասում եմ, բայց 20 տոկոսն է օգտագործում այդ հացը, էլ ոնց 1 միլիոնանոց ժողովրդին համոզեմ, որ սև հաց կերեք»:
Հասմիկ Մովսիսյան