Ադրբեջանը շարունակաբար սրում է իրավիճակը տարածաշրջանում՝ այս անգամ ապօրինի կերպով հսկիչ անցագրային կետ տեղադրելով ԼՂ-ն ՀՀ-ին կապող Լաչինի միջանցքում։ Այս մասին կառավարության նիստի ժամանակ ասաց վարչապետ Նիկոլ Փաշինյանը։
«Ու եթե մինչև հիմա Լաչինի միջանցքը փակ էր կեղծ բնապահպանական ակցիայի պատրվակով, հիմա արդեն պաշտոնապես փակվել է Ադրբեջանի կողմից։ Սա ոչ միայն տարածաշրջանում լարվածությունը մեծացնելու, այլև ԼՂ-ում հումանիտար ճգնաժամը խորացնելուն ուղղված սադրիչ քայլ է։ Միջազգային հանրությունը այս անգամ հստակ գնահատական է տվել ադրբեջանական հսկիչ անցագրային կետի տեղադրմանը Լաչինի միջանցքում»,- ասաց նա։
Փաշինյանը նշեց, որ Ադրբեջանի գործողությունները ԼՂ հայության նկատմամբ էթնիկ զտումներ և ցեղասպանություն իրականացնելն է։
Նա ներկայացրեց հայկական կողմի պատկերացումները իրադրության կարգավորման վերաբերյալ։
«ՌԴ խաղաղապահ ուժերը պետք է իրենց վերահոսկողության տակ պահեն Լաչինի միջանցքն ու ու ապահովեն միջանցքի բնականոն գործունեությունը։ Բացի ՌԴ-ից որևէ մեկը Լաչինի միջանցքում վերահսկողություն չպետք է իրականացնի, Ադրբեջանն էլ չպետք է խոչընդոտի միջանցքի երթևեկությունը, սա այն է, ինչ նախատեսված է նոյեմբերի 9-ի եռակողմ հայտարարությամբ։ ԼՂ հայության իրավունքներն ու անվտանգությունը պետք է դառնա Ստեփանակերտի ու Բաքվի միջև բանակցությունների առարկա միջազգային ֆորմատի շրջանակներում։ Ինչ վերաբերում է ՀՀ-ի ու Ադրբեջանի միջև հնարավոր խաղաղության պայմանագրին, ակնհայտ է, որ այն պետք է ունենա իրագործման երաշխիքների ու վեճերի լուծման մեխանիզմների հասկանալի ու գործուն համակարգ։ Հստակ պետք է արձանագրված լինեն սահմանների դելիմիտացիայի պարամետրերը ու որևէ էսկալացիա բացառելու մեխանիզմներ պետք է ներդրվեն։ Ադրբեջանի ջանքերը ԼՂ-ն վերածելու հայության նոր կառափնարանի, պետք է կասեցվի ու սրա միակ հուսալի ճանապարհը միջազգային լայն մանդատ կրող ներկայացուցիչների ներկայությունն է ԼՂ-ում»,- ասաց Փաշինյանը՝ անհրաժեշտ համարելով միջազգային փաստահավաք առաքելության հրատապ գործուղումը ԼՂ ու Լաչինի միջանցք։
