ՆԱՏՕ-ի գլխավոր քարտուղար Յենս Սթոլթենբերգը հայտարարել է, որ դաշնակիցներն ընդունել են «սառը պատերազմի ավարտից ի վեր ամենաընդգրկուն պաշտպանական պլանները», հայտնում է Հյուսիսատլանտյան դաշինքի մամուլի ծառայությունը։
«Տարածաշրջանային նոր ծրագրերը, որոնք նախատեսված են Դաշինքի երկու հիմնական սպառնալիքներին՝ Ռուսաստանին և ահաբեկչությանը դիմակայելու համար, նախատեսում են բարձր պատրաստվածության մակարդակով 300,000 զինվորականների ներկայություն՝ ներառյալ օդային և նավատորմի զգալի մարտական հզորություն: Դաշնակիցները նաև հաստատել են Պաշտպանական արտադրության նոր գործողությունների ծրագիրը, որն ուղղված է համատեղ գնումների արագացմանը, արտադրական կարողությունների ավելացմանը և դաշնակիցների փոխգործունակության բարձրացմանը»,- հայտնում է ՆԱՏՕ-ի մամուլի ծառայությունը։
Իրենց պաշտպանական կարիքները բավարարելու համար դաշնակիցները հաստատապես պարտավորվել են պաշտպանության ոլորտում ներդնել իրենց համախառն ներքին արդյունքի (ՀՆԱ) առնվազն 2%-ը:
ՆԱՏՕ-ի դաշնակիցները քննարկել են նաև «մարտահրավերները, որոնք ստեղծում է Չինաստանը եվրատլանտյան անվտանգությանն ու արժեքներին»:
«Չինաստանը մեր հակառակորդը չէ, և մենք պետք է շարունակենք փոխգործակցությունը»,- ասել է ՆԱՏՕ-ի գլխավոր քարտուղարը՝ ընդգծելով, սակայն, որ «Պեկինի աճող ինքնավստահությունն ազդում է մեր անվտանգության վրա և մարտահրավեր է նետում կանոնների վրա հիմնված միջազգային կարգին»:
Երեքշաբթի օրը ՆԱՏՕ-ի դաշնակիցները հայտարարել են, որ լրջորեն անհանգստացած են «դաշնակիցների տարածքում Իրանի չարամիտ գործողություններով» և կոչ են արել Թեհրանին «դադարեցնել ռազմական աջակցությունը Ռուսաստանին, ներառյալ անօդաչու սարքերի մատակարարումը», հաղորդում է Reuters-ը:
