Նիկոլ Փաշինյանը ՀՀ քաղաքացիներին իրականությունից կտրելու ու հնարավոր բողոքի ձայնը խլացնելու համար որևէ նոր մեթոդի չի դիմում: Նա իր մտահաղացմամբ կամ այլոց խորհրդով դիմում է հին ու փորձված մեթոդների, որոնք գոյություն ունեն ոչ թե տասնամյակներ, այլ հարյուրամյակներ: Գոյություն ունեցող տեխնոլոգիաներից ամենաշատը՝ մասնավորապես վերջին շրջանում, Հայաստան կիրառվում է «հաց և տեսարաններ»-ը: Մեր դեպքում «հացը» կարող ենք համարել ամենատարբեր չինովնիկների՝ դատավորների, դատախազների, նախարարների, պատգամավորների և այլոց աշխատավարձերի բարձրացումը, ինչպես նաև թոշակի աննշան ավելացումը, իսկ ահա «տեսարանների» մասով պակաս չկա:
Ինչպես նկատում ենք, «հացը» բաժին է հասնում բացառապես վերնախավին, որպեսզի վերջիններս անգամ մտքի ծայրով չմտածեն ընդդիմանալու մասին, իսկ «տեսարանները» շարքային քաղաքացիների համար են:
Հենց ասվածի մեջ կարող եք տեղավորել այն անթիվ ու անհամար փառատոն կոչվածները, որոնք կազմակերպվում ու անցկացվում են ոչ միայն մայրաքաղաք Երևանում, այլ Հայաստանի ամբողջ տարածքում: Իշխանություններն ամեն ինչ անում են շարքային քաղաքացիներին ցույց տալու համար, որ երկրում որևէ խնդիր չկա, չկա անվտանգային խնդիր, սոցիալական խնդիրներ և ի վերջո՝ Արցախի խնդիր:
Նիկոլ Փաշինյանին այս գործում լուրջ օգնություն է ցուցաբերում Երևանի փոխքաղաքապետ Տիգրան Ավինյանը, ով քաղաքապետ Հրաչյա Սարգսյանի հեռացվելուց հետո փաստացի կուռացիա է անում քաղաքապետարանը: Ավինյանը փաստացի ավելի քան 1 միլիոն ՀՀ քաղաքացու ղեկավար է ու երազանք ունի սեպտեմբերի 17-ից ահետո նաև դե յուրե այդպիսին լինել: Դժվար է հաշվել, թե վերջին ամիսներին քանի համերգ, փառատոն ու այլ միջոցառումներ են կազմակերպվել Երևանում: Դա այլ պարագայում դրական կլիներ, սակայն ավելի քան 200 օր շրջափակման մեջ գտնվող Արցախ ունենալու, սովամահության դեպքերի գրանցվելու պարագայում դա ավելի քան մտահոգիչ է ու հարցերի տեղիք տվող: Չնայած՝ մյուս կողմից էլ պարզ է, որ այլ պարագայում նշյալ փառատոններն ու համերգները չէին լինելու. Դրանց իմաստն ուղղակի չէր լինելու:
Օգոստոսի 21-ին Տիգրան Ավինյանը հայտարարեց հերթական միջոցառման մասին՝ Թումոյի այգում կազմակերպվելու են օպերայի երեկոներ: Այսպես ասած՝ «մեր սև սիրտ, Ավինյանի գունավոր օպերաներ»: Փոխքաղաքապետն այսպես իր ներդրումն է ունենում «տեսարանների» ապահվոման գործում, իսկ մյուս կողմից ՝ թույլ է տալիս իր ենթականերին «տեսարաններ» ապահովել մտերիմ շրջապատում: Այս ժամանակահատվածում, երբ հազարավոր հայեր, բառի բուն իմաստով սնունդի խնդիր ունեն, կենաց մահու պայքար են մղում, Երևանի Կենտրոն վարչական շրջանի ղեկավարը շքեղ երեկույթ է կազմակերպում հայտնի ռեստորաններից մեկում՝ ամաններ կոտրելով ընկերոջ գլխին: Այս ամենը նկարահանվում է ու հրապարակվում սոցկայքում: Բնականաբար, փարթիին չէին կարող պատահաբար մարդիկ ներկա լինել, հետևաբար չէր էլ կարող նման տեսանյութը հրապարակվել առանց պաշտոնյայի ցանկության:
«Հեղափոխականներն» արդեն մի քանի անգամ գերազանցել են «նախկին թալանչիներին»: Նրանք ամեն կերպ ցույց են տալիս, որ իրենց ամենևին չի հետաքրքրում Արցախի, արցախցու, ինչու ոչ՝ նաև Հայաստանի ու հայաստանցու ճակատագիրը: Իրենց համար կարևորն իրենց զվարճանքներն են ու բարեկեցությունը, իսկ շարքային քաղաքացու համար կա երկու բան «հաց և տեսարաններ»: