Կառավարման փորձագետ Հարություն Մեսրոբյանն այսօր սահմանադրական բարեփոխումներ թեմայով հրավիրված ասուլիսին նախընտրեց ոչ թե իր տեսակետը հայտնել, այլ օրինաչափություններից խոսել և հայտարարեց՝ «Հայաստանին պետք է հիբրիդային կառավարման համակարգ և ոչ թե անցում կիսանախագահականից խորհրդարանականի»:
Ըստ նրա, ներկայացված տեսակետների 90 տոկոսը աղբ է: «Կառավարման մեջ կա ազդանշան և աղմուկ: Հիմա ներկայացված տեսակետներից 10%-ն է միայն ազդանշան, իսկ մնացածը ներկայացնում են, ժողովրդի ասած, «մուտիլովկայի» տեսքով»,- ասաց նա:
Փորձագետը խոսեց նոր սահմանադրական նախագծից, մասնավորապես ընտրված խորհրդարանական կառավարման համակարգից և ընդգծեց, թե այս մոդելն աշխարհում տարածված երեք անհաջող մոդելներից մեկն է՝ նախագահական, կիսանախագահական և խորհրդարանական: «Այստեղ նախագահականի հետ վարչապետականը կավելացնեի, և կասեի, որ իրականության մեջ այս համակարգը վարչապետական է»,- ասաց նա և նշեց, որ եթե խորհրդարանի ինչ-որ ուժ ունի մեծամասնություն, վարչապետը կլինի այդ ուժի լիդերը:
«Ստացվում է վարչապետական, որովհետև տնտեսությունը, արտաքին գործերը և ուժային կառույցները անցնում են վարչապետին, որն էլ վերահսկողության տակ կպահի և՛ խորհրդարանը, և՛ գործադիր մարմինը, և՛ ուժային կառույցները»,- ասաց նա:
Կառավարման փորձագետը նշեց, որ ուսումնասիրել է 11 պետության փորձ, որոնք Համաշխարհային պատերազմից հետո թռիչք են կատարել: «Ոչ մեկը այդ երեք մոդելն էլ չունի՝ Չինաստան, Վիետնամ, Իրան»,- ասաց նա:
Մեսրոբյանը նշեց, թե ցանկացած կառավարման համակարգ իրականության մեջ տարբեր ռեժիմներում է հայտնվում, իսկ Հայաստանը գտնվում է «ոչ խաղաղություն, ոչ պատերազմ» ռեժիմում, բնականաբար, կառավարման համակարգն էլ պետք է համապատասխանի իրական վիճակին:
Իսկ թե որ երկիրն է նման մոդելի կրող,նա օրինակ բերեց Չինաստանը: «Այնտեղ թիմային մոտեցումն է, տասը տարին մեկ գրեթե ամբողջությամբ կառավարիչներին փոխում են, իսկ երբ հերթականը գալիս է, որոշում են հաջորդին», -ասաց նա: