Շատ հաճախ ենք հայտնաբերում, որ միջազգային հռչակ ունեցող այս կամ այն հայտնի մարդն ունի հայկական ծագում: Զարմանալի ոչինչ չկա, քանզի հայ ազգն իր մտավոր եւ նյութական ներուժի շնորհիվ աշխարհին է տվել բազմաթիվ տաղանդավոր ռազմական եւ քաղաքական գործիչներ, գիտության, մշակույթի, սպորտի, բիզնեսի եւ այլ բնագավառների այնպիսի մարդիկ, առանց որոնց թողած ժառանգության աշխարհը լիարժեք չէր լինի: Ձեզ ենք ներկայացնում հայ գյուտարարներից մի քանիսին:
Քրիստափոր Տեր-Սերոբյանն ամերիկյան դոլարի կանաչ եւ սեւ գույների գյուտի հեղինակն է: Իր աշխատանքի դիմաց Տեր-Սերոբյանը ստացել է 6000 դոլար, որով շարունակել է ուսումը:
Լյութեր Ջորջ Սիմիջյանն ավելի քան 200 գյուտերի հեղինակ է: Մեր ժամանակների «Էդիսոնին» են պատկանում բանկոմատի, ինքնանկարող լուսախցիկի, հեռուստահուշարարի, մանրադիտակային պատկերների լուսարձակի գյուտերը:
Վարազդատ Քազանջյանը 1914 թվականին առաջին կոսմետիկ վիրահատությունը կատարած ամերիկահայ վիրաբույժն է: Առաջին համաշխարհային պատերազմից հետո Հարվարդի համալսարանում ստեղծում է համապատասխան բաժին և պատրաստում առաջին կոսմետիկ վիրաբույժներին:
Արթուր Բուլբուլյանը ստեղծել է А-14 թթվածնային դիմակները, որոնք ամերիկյան ռազմաօդային ուժերն օգտագործել են Երկրորդ համաշխարհային պատերազմի ժամանակ:
Ալեք Մանուկյանը 1954 թվականին արտոնագրեց միաբռնակ ծորակը, որից կարող է և՛ տաք, և՛ սառը ջուր հոսել: Սա հեղափոխություն էր ջրամատակարարման համակարգում:
Գաբրիել Քազանջյանը մազերի չորացման սարքի` ֆենի գյուտի հեղինակն է: Այն պաշտոնապես գրանցվել է 1911 թվականին:
Ալբերտ Կապիկյանն ամերիկահայ վարակաբան է, ով մշակել է առաջին արտոնագրված պատվաստանյութը ռոտավիրուսային վարակի դեմ:
Միքայել Տեր-Պողոսյանը 1977 թվականին ստեղծել է համակարգչային տոմոգրաֆիայի միջոցով մարդու մարմնի պատկերը վերարտադրող սարքը:
Ռեյմոնդ Դամադյանը ստեղծել է միջուկային մագնետիկ ռեզոնանսի սկզբունքով գործող սքաները, առանց որի անհնար է պատկերացնել ժամանակակից բժշկությունը:
Ասատուր Սարաֆյանը մեքենաների ավտոմատ փոխանցման տուփի, բենզինային պոմպի և ավտոյուղի չափիչի գյուտերի հեղինակն է: Նրա հանճարեղ մտքի արգասիքն են նաև ուղղաթիռի տրանսմիսիան և բազմագույն տպիչ սարքը:
Արտյոմ Միկոյան՝ աշխարհահռչակ ավիակոնստրուկտոր, ինժեներատեխնիկական ծառայության գեներալ-գնդապետ, ՄԻԳ ռազմական օդանավերի ստեղծողը։
Հովհաննես Ադամյանը գունավոր հեռուստատեսության և լուսահեռագրության գյուտարարն է: 1925 թվականին Երևանի համալսարանի լաբորատորիայում նա պատրաստել և գործողության մեջ է դրել «հեռատես» եռագույն պատկերման սարքը: Նրա մշակած եռագույն հեռուստատեսությունն առաջին անգամ կիրառվել է Լոնդոնում 1928 թվականին:
Ստեփան Ստեփանյանին է պատկանում բեռնատարի թափքի բետոնախառնիչի գաղափարը, որը մեծ նշանակություն է ունեցել շինարարության զարգացման մեջ:
.jpg)
Էմիք Ավագյանը հաշմանդամների խնդիրները թեթևացնող մի շարք գյուտերի հեղինակ է: 1961 թվականին ԱՄՆ նախագահ Ջոն Քենեդին նրան պարգևատրել է հաշմանդամների խնդիրների լուծման գործում մեծ ներդրումների համար: Նա է ստեղծել ձեռքով կառավարվող անվասայլակը:
Ռոջեր Էդուարդ Քոլլինգվուդ Ալթունյանը հայտնագործել է ասթմայով հիվանդ մարդկանց համար ինհալյատորը և նատրիումի քրոմոլինը` նախատեսված ասթմայի, ալերգիայի բուժման համար:
Ռուբեն Էքսերջյանը հայտնագործել է զենիթային հրանոթը, որը Երկրորդ համաշխարհային պատերազմի ժամանակ օգտագործվում էր ԱՄՆ ռազմական ուժերի կողմից:
Արտաշես Հայկանյանը ստեղծել է առաջին պլաստիկ տարաները, Coca-Cola-ի պլաստիկ շշերի արտադրության մեքենան, մեքենայի դիմապակիների մաքրիչները, հյութերի ձողիկներն ու էլի մի քանի գյուտերի հեղինակ է:
