Եվրոպայի Խաղաղության Դեմոկրատական Մեջլիսի (ABDEM) մի խումբ անդամներ, որոնք համարվում են թուրքական սփյուռքի ներկայացուցիչներ, այսօր Երևանում կայացած մամուլի ասուլիսի ժամանակ հայտարարեցին, որ իրենք ապրիլի 24-ին կայցելեն Ցեղասպանության հուշահամալիր և հայտարարությամբ հանդես կգան՝ պահանջելով Թուրքիայից ճանաչել Հայոց ցեղասպանությունը և կրել Եղեռնի ողջ պատասխանատվությունը։
Կազմակերպության անդամ, ազգությամբ քուրդ, Ֆրանսիայի քաղաքացի Րոժդա Յիլդիրիմը նաև ուրախություն հայտնեց Հայաստանում լինելու համար և նշեց, որ իրենք Մեջլիսի անդամ լինելով՝ Հայոց ցեղասպանության և հայ ժողովրդին քաջալերելու համար են Հայաստանում: «Խաղաղության համար ենք այստեղ և կուզենք, որ այս հարցը խաղաղությամբ լուծվի: Մեր այցելության նպատակը Հայոց ցեղասպանության օրն է, ցեղասպանություն ապրած բոլոր ժողովուրդները մեզ համար կարևոր են, մենք ուզում ենք, որ Հայոց ցեղասպանության իրողությունն ամեն տեղ ասվի և ամեն տեղ ճանաչվի»,-ասաց նա:
Վերջինիս խոսքով՝ իրենք ուզում են, որ Թուրքիան իր պատմության հետ առերեսվի և ճանաչի իր արածները, իսկ եթե դա չլինի, Թուրքիայում դեմոկրատիա չի լինի, և թուրք ժողովուրդը պետք է առերեսվի այդ ոճրի հետ:
Անդրադառնալով իրենց կազմակերպությանը՝ նա նշեց, որ այն հիմնադրվել է Եվրոպայում և կապ չունի թուրք կառավարության հետ: Հայաստան գալուց առաջ էլ մամուլի ասուլիս են հրավիրել և ասել, որ գալիս են Հայաստան: «Մենք 2013թ-ին ենք ստեղծվել, մենք ուզում ենք, որ Թուրքիայում խաղաղություն և դեմոկրատիա լինի»,-ասաց նա՝ ընդգծելով, որ իրենք չեն պատկերացնում Թուրքիայի դեմոկրատիան առանց Հայոց ցեղասպանության ճանաչման:
Նշենք, որ Մեջլիսի բոլոր անդամները թուրքական արմատներ ունեն և գաղթել են Եվրոպա: Կազմակերպության կենտրոնը Գերմանիայում է, բայց բոլոր երկրներում խմբեր ունեն և ավելի քան 1 մլն. անդամներ:
Ասուլիսի մյուս բանախոս, ազգությամբ թուրք և Թուրքիայի քաղաքացի Ալիէքբաֆ Փեկթաշը նույնպես նշեց, որ ուրախ է Հայաստանում գտնվելու առթիվ: «Մենք ճանաչում ենք Ցեղասպանությունը և այսօր այստեղ ենք։ Մենք այսօր ալևիների ձայնն այստեղ նաև բերելու համար ենք եկել, քանի որ Թուրքիայի մեկ երրորդը ալևի է»,-ասաց նա:
Իսկ հարցին, թե ինչպես է թուրք գործիչը պատկերացնում Հայոց ցեղասպանության հատուցման գործընթացը, պատասխանեց. «Թուրքիայի Հանրապետությունը պետք է ներողություն խնդրի, հայերն ինչ ուզում են, Թուրքիան պետք է կատարի, մենք կողմ ենք հայերի պահանջներին»: