Երեկ ավիավթարի արդյունքում կյանքից հեռացած Քոբի Բրայանթը Լոս Անջելեսի հայերի սիրելի մարզիկներից մեկն էր: Սակայն 2010 թվականին տեղի հայերի ու Քոբիի միջև «միջադեպ» տեղի ունեցավ այն բանից հետո, երբ վերջինս պայմանագիր կնքեց թուրքական Turkish Airlines-ի հետ:
Պայմանագրի շրջանակներում Քոբին պարտավորվում էր նկարահանվել ընկերության գովազդային հոլովակներում, ինչը դուր չէր եկել տեղի, ինչպես նաև Կանադայի հայերին:
Հայերը նույնիսկ ակցիաներ արեցին՝ նշելով, որ Քոբին չպետք է գնար այդ քայլին՝ հաշվի առնելով այն, որ Կալիֆորնիայում մեծ թվով հայեր են ապրում, որոնք 1915 թվակաի Հայոց ցեղասպանությունից փրկվածների ժառանգներն են:
Տորոնտոյի հայերը ևս ակցիա կազմակերպեցին, երբ Քոբին մեկնել էր Կանադա:
Ամեն դեպքում այդ ամենը չխանգարեց Քոբիի ու թուրքական ավիաընկերության համագործակցությանը, որի շրջանակներում նա նկարահանվեց նաև Լեոնել Մեսսիի հետ, ով ևս պայմանագիր ուներ թուրքական ընկերության հետ:
