Հնարավոր է արդյո՞ք, որ նավթի գների անկման պարագայում փոփոխություն լինի Հայաստանին մատակարարվող գազի գնի հարցում:
Քիչ առաջ մամուլի ասուլիսի ժամանակ ՀՀ փոխվարչապետ Մհեր Գրիգորյանը հայտարարեց, որ գազի գնի փոփոխություն աշխարհում իհարկե տեղի կունենա: Նա նշեց, որ առհասարակ էներգառեսուրսների գնի փոփոխություն կա. «Իհարկե նավթի գնի անկումը կհանգեցնի այլ էներգակիրների գնի փոփոխման, չեմ բացառում, որ նվազման տեսքով: Իհարկե քննարկումներ սկսվելու են, մենք մեր դիրքերը պետք է գնահատենք»:
Գրիգորյանն ամեն դեպքում ասաց, որ նավթի գնից բխող գազի գնի տատանումը տալիս է որոշակի էֆեկտներ:
Խոսքն այն մասին է, երբ գնումն իրականացվում է լողացող բանաձևով. «Մեր դեպքում բանաձև չէ, կա ֆիքսված գին, որը որոշ դեպքերում տալիս է դրական, որոշ դեպքերում ոչ այնքան դրական արդյունքներ:
Բայց ամեն դեպքում մենք պետք է վերլուծություններ անենք, հասկանանք՝ եթե իրավիճակը երկար է տևելու, բանաձևային գնի տարբերակը մեզ համար ավելի ընդունելի է և մատչելի կլինի:
Սակայն օրինակ 10 օրվա անկման պարագայում հարցին միանգամից անդրադառնալ սխալ կլինի: Նույնիսկ մեկ ամսվա կտրվածքով գնի անկումը, դրա հիման վրա որոշումը կայացնելը, բանաձևայինին անցնելը սխալ կլինի:
Ամեն դեպքում տենդեցները ցույց են տալիս, որ չի բացառվում նման քննարկում նախաձեռնենք»:
