Իրականում մեր խնդիրն այն չէ, որ հիվանդությունները զրոյացնենք ու բացառենք, որ հիվանդություններ չլինեն, դա այնքան էլ ադեկվատ նպատակ չէ: Մեր խնդիրն այն է, որ հիվանդությունները գրանցվեն մեր առողջապահական համակարգի կարողություններին համապատասխան: Այս մասին ֆեյսբուքյան ուղիղ եթերում հայտարարեց վարչապետ Նիկոլ Փաշինյանը:
«Անցած տարվա և այս տարվա առաջին 6 ամիսների վիճակագրությունը ցույց է տալիս՝ երբ մենք կարողանում ենք սպասարկել կորոնավիրուսով մեր հիվանդներին, մեր բոլոր հիվանդներին, մահացության ընդհանուր թվի նվազում ենք ունենում:
Երբ այդ հիվանդությանը հնարավորություն չենք տալիս գալ մի կետի վրա կենտրոնանալ այնքան, որ տասնյակ հազարներ հիվանդանան, դա մեր տնտեսական, առողջապահական համակարգերի համար շատ ավելի տանելի է դառնում և ի վերջո մենք հնարավորություն ենք ստանում ձեռք բերել իմունիտետ այդ հիվանդության նկատմամբ»,-ասաց նա:
«Եթե հաջողվի ես, մեր ընտանիքն ասիմպտոմ մինչև վերջ տանենք, մի պահի թեստ անենք ու տեսնենք, որ բացասական է, մենք առաջիկա մեկ տարում կվերադառնանք լիարժեք կյանքի: Արփին արդեն կարող է գնալ մանկապարտեզ, կարող ենք մեր հարազատների հետ շփվել՝ իմանալով, որ մենք նրանց չենք վարակել, մենք էլ չենք վարակվելու:
Բայց խնդիրն այն է, որ այս պրոցեսը պետք է պահենք կառավարելի: Դրա համար ամեն ինչ պետք է անել այլոց չվարակելու համար, առաջնորդվելով կանխավարկածով, որ վարակված ես ու պետք է չվարակես այլոց»,-հավելեց վարչապետը:
Այն, որ կորոնավիրուսով վարակվելուց ու բուժվելուց հետո առնվազն մեկ տարով իմունիտետ ես ձեռք բերում, թերևս նորություն է:
Նիկոլ Փաշինյանն իր այսօրվա ուղիղ եթերում մի քանի անգամ կրկնեց, որ այսօրվա ամբողջ ասելիքը պետք է տեսնել մեկ ամբողջականության մեջ, պետք չէ առանձին-առանձին դիտարկել: Ուստի, հորդորում ենք նայել ամբողջական տեսանյութը:
