«Goris Today»-ի տեղեկություններով, այսօր՝ հուլիսի 2-ին, Գորիսում հաստատվել է նոր կորոնավիրուսային հիվանդության 6 նոր դեպք: Մեր աղբյուրի փոխանցմամբ, օջախները տարբեր են, իսկ կոնտակտավորների թիվը բավականին մեծ է:
ՀՀ ոստիկանության Գորիսի բաժնից «Goris Today»-ին տեղեկացրին, որ այս պահին բաժնի աշխատակիցները, Սյունիքի մարզային փրկարարական վարչության ծառայողներն ու առողջապահության ոլորտի ներկայացուցիչներն անհրաժեշտ աշխատանքներ են տանում կորոնավիրուսով վարակված նոր դեպքերի շփման շրջանակը պարզելու ուղղությամբ՝ նրանց մեկուսացնելու նպատակով:
Ոստիկանության Գորիսի բաժնի փոխանցած տվյալների համապատասխան, հուլիսի 1-ի և 2-ի ստուգումների արդյունքում, դիմակ չկրելու համար 50 անձի նկատմամբ կազմվել է արձանագրություն։ Վերջին շրջանում հաստատված վարակակիրների անմիջական կոնտակտավորներից ոմանք խախտել են պարտադիր ինքնամեկուսացման պահանջը, ինչի փաստով կազմվել են վարչական իրավախախտման վերաբերյալ արձանագրություններ: «Երեկ՝ հուլիսի 1-ին, պարտադիր ինքնամեկուսացման պայմանը խախտելու հիմքով արձանագրություն է կազմվել Գորիսի բազմաբնակարան շենքերից մեկի՝ նախկին հանրակացարանի բնակչի նկատմամբ, ով տուգանվել է 100.000 դրամով»,-այս մասին նշեցին ոստիկանության Գորիսի բաժնից:
Գորիսի վարակակիրները բուժում են ստանում «Կապան» ԲԿ-ում և Երևանի բժշկական կենտրոններում, ինչպես նաև կան վարակակիրներ, ովքեր մեկուսացված են տնային պայմաններում:
Մանրամասն՝ սկզբնաղբյուր կայքում
