Կորոնավիրուս Հասարակություն 

ՄԱԿ-ի հայաստանյան գրասենյակը հրապարակում է իր՝ COVID-19-ի սոցիալ-տնտեսական արձագանքման և վերականգնման պլանը

 

ՄԱԿ-ի հայաստանյան գրասենյակը հրապարակել է իր՝ ՔՈՎԻԴ-19-ի սոցիալ-տնտեսական արձագանքման և վերականգնման պլանը (ՍՏԱՎՊ), որը ներկայացնում է Հայաստանում համավարակի դեմ պայքարի ՄԱԿ-ի տեսլականը:

Հայաստանում ՔՈՎԻԴ-19-ի սոցիալ-տնտեսական հետևանքներն արդյունավետ լուծելու նպատակով՝ պլանն առաջարկում է ներառական մոտեցում, որը հնարավորություն կընձեռի փրկել կյանքեր, չանտեսելով ոչ մեկին՝ պաշտպանել մարդկանց և համայնքները՝ միաժամանակ վերականգնվելով ավելի լավ հիմունքներով:

Պլանը մշակվել է ՄԱԿ-ի հայաստանյան թիմի կողմից՝ ՀՀ կառավարության, քաղաքացիական հասարակության, միջազգային գործընկերների և այլ շահագրգիռ կողմերի հետ խորհրդակցություններից հետո:

Պլանը կազմվել է ՄԱԿ-ի համաշխարհային շրջանակի կառուցվածքի հիման վրա՝ կենտրոնանալով ռազմավարական 5 հիմնասյուների վրա՝

1) առողջապահություն,

2) բնակչության պաշտպանություն,

3) տնտեսական արձագանք և վերականգնում,

4) մակրոտնտեսական արձագանք և բազմակողմ համագործակցություն,

5) սոցիալական համախմբվածություն և կայուն համայնքներ:

Բացի այդ, Պլանը ներառում է համավարակի հետևանքների լուծմանն ուղղված երեք տեսակի ծրագրային արձագանք՝

1) ընթացիկ ծրագրեր, որոնք արագ վերապրոֆիլավորվել են՝ արձագանքելու ՔՈՎԻԴ-19 ճգնաժամին,

2) նոր ծրագրեր, որոնք արդեն իսկ իրականացման փուլում են, և

3) առաջարկվող ծրագրեր, որոնք կազմում են առաջնահերթ գործողությունների շարք՝ անհրաժեշտ երկրի և բնակչության վրա ՔՈՎԻԴ-19-ի բացասական ազդեցությունը հաղթահարելու համար:

«Մենք անչափ գնահատում են    ք ՀՀ կառավարության և մեր բոլոր դոնոր գործընկերների աջակցությունը՝ այս Պլանը այդքան հրատապ գործարկելու համար:

ՄԱԿ-ի տասներկու գործակալությունները, Արժույթի միջազգային հիմնադրամի հետ միասին, համախմբվեցին՝ համաշխարհային լավագույն փորձը հայկական համատեքստում իրագործելու համար՝ ընդգծելով հրատապ կարիքները և մինչ օրս գրանցած կարևոր ձեռքբերումները, ինչպես նաև՝ միջնաժամկետ հեռանկարում առկա բացերը:

Այս ամենի նպատակն է՝ օգնել մարդկանց հաղթահարել համավարակը և դրանից դուրս գալ ապագայի ճգնաժամերի հանդեպ ավելի դիմացկուն համայնքներով և ազգային համակարգերով:

Մենք մեր ուշադրության կենտրոնում ենք պահել սոցիալական պաշտպանությունը, փոքր և միջին բիզնեսները, գենդերային հավասարությունը, շրջակա միջավայրը և կանաչ աճը՝  Կայուն զարգացման նպատակների և Հայաստանի վերափոխման նոր ռազմավարության ձեռքբերման ճանապարհին կարևոր գործընթացներն արագացնելու նպատակով», - ընդգծեց Հայաստանում ՄԱԿ-ի մշտական համակարգողը:

Սոցիալ-տնտեսական արձագանքման և վերականգնման պլանը մշակվել է ՄԱԿ-ի մշտական համակարգողի գրասենյակի ընդհանուր ղեկավարության և ՄԱԿ-ի Զարգացման ծրագրի տեխնիկական ղեկավարության ներքո և առաջնորդվում է ազգային առաջնահերթություններով և կարիքներով, ինչպես նաև՝ հիմնվում է ՄԱԿ-ի հայաստանյան գրասենյակի թիմի և գործընկերների կողմից իրականացված սոցիալական և տնտեսական հետևանքների գնահատումների վրա:

Պլանը ներկայացնում է վերականգնման ինտեգրված մոտեցում, որը համատեղում է ՄԱԿ-ի զարգացման համակարգի փորձագիտական ներուժը և ռեսուրսները, ներառյալ՝ Հայաստանում ներկայացված ՄԱԿ-ի 12 գործակալությունները և երկու Տարածաշրջանային տնտեսական հանձնաժողովները՝ զարգացման գործընկերների հետ համագործակցությամբ:

Պլանը նաև հիմնվել է ՄԱԿ-ի կողմից իրականացված մի շարք գնահատումներից ստացված ապացույցների և եզրակացությունների վրա, հատկապես՝ սույն թվականի սեպտեմբերին ավարտված ՔՈՎԻԴ-19 սոցիալ-տնտեսական ազդեցության գնահատման (ՍՏԱԳ) զեկույցի վրա, որն իրականացվել է ՄԱԿ-ի Զարգացման ծրագրի ղեկավարության ներքո:

ՀՀ փոխվարչապետ Մհեր Գրիգորյանը նշեց, որ ՄԱԿ-ի սոցիալ-տնտեսական արձագանքման և վերականգնման պլանը մշակվել է Հայաստանի՝ ՔՈՎԻԴ-19 համավարակին արձագանքելու կարևոր պահի:

«Այն իրենից ներկայացնում է գործնական շրջանակ, որն անդրադառնում է և՛ ճգնաժամին անհապաղ արձագանքմանը՝ ներառյալ արդեն իսկ ձեռք բերած նվաճումները, և՛ ավելի լավ հիմունքներով վերականգնման համար անհրաժեշտ երկարաժամկետ կարիքներին:

Քանի որ մենք ներկայումս մշակում ենք վերականգնման մեր միջնաժամկետ ծրագիրը, Հայաստանի կառավարությունը ողջունում է ՄԱԿ-ի փոխլրացնող ջանքերը և ձգտելու է հիմնվել դրանց վրա՝ մեր՝ զարգացման այլ միջազգային գործընկերների հետ միասին:

ՔՈՎԻԴ-19 համավարակի հետևանքների դեմ համատեղ պայքարը կարևոր քայլ է դեպի Հայաստանում կայուն զարգացման ընդհանուր տեսլականը», - ավելացրեց փոխվարչապետը:

Պլանում նկարագրված ռազմավարական ուղղությունները և ծրագրերն ընդգրկում են առաջիկա 12-18 ամիսները՝ կենտրոնանալով վիրուսի տարածումը կանխելու և համավարակը դադարեցնելու նպատակով անհապաղ առողջապահական արձագանքի վրա և անդրադառնալով կարճաժամկետ սոցիալական, տնտեսական և մարդասիրական կարիքներին:

Միևնույն ժամանակ, Պլանը կենտրոնանում է ավելի միջնաժամկետ և երկարաժամկետ սոցիալական, տնտեսական և առողջապահական հետևանքների վրա՝ փորձելով առաջնահերթ լուծել ամենախոցելիների կարիքները:

Մինչ Սոցիալ-տնտեսական արձագանքման և վերականգնման պլանի բյուջեն կազմում է 33.1 միլիոն ԱՄՆ դոլար, ՄԱԿ-ի հայաստանյան գրասենյակի և դոնոր գործընկերների համատեղ ջանքերի շնորհիվ, անհրաժեշտ ֆինասավորման չափը կազմում է 15.2 միլիոն ԱՄՆ դոլար:

Մինչ օրս հաջողությամբ  վերապրոֆիլավորվել են ընդհանուր շուրջ 2.7 միլիոն ԱՄՆ դոլար բյուջեով ընթացիկ ծրագրեր, ևս 15.2 միլիոնը արդեն իսկ հավաքագրվել է նոր ծրագրերի համար, որոնք կաջակցեն ՔՈՎԻԴ-19-ի արձագանքման և վերականգնմանն ուղղած ջանքերին:

Սոցիալ-տնտեսական արձագանքման և վերականգնման պլանը ներկայացվել է Կառավարությանը և միջազգային գործընկերներին Զարգացման գործընկերների համակարգման հարթակի հանդիպման ժամանակ, որը տեղի է ունեցել սեպտեմբերի 18-ին: Հանդիպումը համանախագահել են ՀՀ փոխվարչապետ Մհեր Գրիգորյանը և ՄԱԿ-ի մշտական համակարգող Շոմբի Շարփը:

Պլանը նաև յուրահատուկ կամուրջ է դեպի առաջիկա ՄԱԿ-ի Կայուն զարգացման գործընկերության շրջանակ, որն ուրվագծում է Հայաստանում 2021-2025 թթ-ին ՄԱԿ-ի գործունեությունը և աջակցությունը Կառավարությանը՝ երկրի երկարաժամկետ զարգացման համար:

***

Սոցիալ-տնտեսական արձագանքման և վերականգնման պլանն ամբողջությամբ կարող եք ընթերցել / ներբեռնել այստեղ:

  •  
  •  
  •  
  • 2
  •  
  •  
  •  
  •  
  •  
    2
    Shares

Նույն շարքից