Հունվարի 20-ին Ռուսաստանի Դաշնության փոխարտգործնախարար Իգոր Մորգուլովը խորհրդակցություն է անցկացրել Հայաստանի փոխարտգործնախարար Ավետ Ադոնցի հետ: Այս մասին հայտնում է ՌԴ ԱԳՆ մամուլի ծառայությունը:
«Քննարկվել են Եվրասիայի տարածաշրջանում անվտանգության ամրապնդման գործում երկու երկրների փոխգործակցությանն առնչվող հարցեր, այդ թվում՝ ՇՀԿ-ի (Շանհայի համագործակցության կազմակերպություն) հետ ՀԱԿՊ-ի և ԱՊՀ-ի գործընկերային կապերի ամրապնդման, մայրցամաքում տնտեսական կապակցվածության զարգացման եղանակով՝ նախևառաջ Եվրասիական տնտեսական միության կառուցման և Չինաստանի՝ «Մեկ գոտի, մեկ ճանապարհ» նախաձեռնության շրջանակներում արվող ջանքերի համատեքստում»,- ասվում է ՌԴ ԱԳՆ մամուլի հաղորդագրության մեջ:
Գերատեսչությունից նշել են, որ բանակցություններն անցել են կառուցողական և վստահության մթնոլորտում, նպաստել են ՌԴ և ՀՀ արտաքին քաղաքական գերատեսչությունների գծով փոխգործակցության համակարգմանը:
