Ես հիմա այն վիճակում եմ գտնվում, որ ինձ համար մի երկու հոդված ավել կամ պակաս, որևէ դերակատարում չի փոխում: Հենց հիմա իմ վրա 6 քրեական գործ կա, որից մեկն այս բեմադրության համար է: Այս մասին լրագրողների հետ զրույցում հայտարարեց «ՎԵՏՕ» հասարակական-քաղաքական շարժման ղեկավար Նարեկ Մալյանը՝ պատասխանելով հարցին, արդյո՞ք մտավախություն չկա, որ հիմա իրեն բերման կենթարկեն:
Նշենք, որ քիչ առաջ Բաղրամյան պողոտայում տեղի ունեցավ Չաուշեսկուների գնդակահարության վերաբերյալ պերֆորմանս ներկայացումը:
Մալյանը նշեց, որ Հայաստանի իշխանությունները գտան, որ «մահ դավաճաններին» կոչը վտանգ է պարունակում իրենց նկատմամբ. «Դրա համար ինձ ձերբակալեցին, ազատազրկեցին, հետո դատարանով ազատ արձակեցին: Սրա համար արդեն նստել եմ, նոր բան պետք է մտածեն իշխանությունները»:
«Ներկայացումը նվիրված էր Չաուշեսկուների ընտանիքի գնդակահարությանը և կրում էր «մահ՝ դավաճաններին» վերնագիրը: Իմաստն այն է, որ դեռևս լավ խորությամբ չի ուսումնասիրվել նրանց դատը, դատավարությունը, գնդակահարության փաստը, բոլոր մանրամասները: Սա ստեղծագործող մարդկանց համար ստեղծագործելու համար մեծ նյութ է տալիս:
Ի դեպ ասեմ, որ Չաուշեսկուների գնդակահարությունից առաջ իրենց բանակն անցավ ժողովրդի կողմը, սակայն մինչև վերջ ԱԱԾ-ն մնաց նրա կողքին:
Ըստ էության սա մի մեծ ողբերգություն է իրենից ներկայացնում, որտեղ իշխանությունից կառչած զույգն ունենում է նման ցավալի վերջաբան:
Ես չէի ցանկանա, որ նման վերջաբան լիներ որևիցե մի տեղ: Առավել ևս որ մեր երկրում մահապատիժը որպես պատիժ գոյություն չունի:
Մենք այս ուղերձով ուզում ենք բոլորին հասցնել այն միտքը, որի չի կարելի չարաշահել ժողովրդի համբերությունը: Սա ավելի շատ կանխարգելող, քան կանխատեսող ուղերձ ուներ: Բայց ասում եմ, որ սա ֆուտուրիստական ներկայացում է, այսինքն ուղղված է ապագային:
Վաղն ինձ մեղադրանք են առաջադրելու այս ներկայացման համար: Ես առաջին մարդն եմ լինելու, ով նստելու է Չաուշեսկուների գնդակահարության գործով: Ես նաև բեմադրելու եմ «Դեբիլների ապստամբություն» բալետը»»,-ասաց նա: