Այսօր կայացած բանակցությունների ժամանակ մենք արձանագրել ենք, որ մեր երկրների միջև ակտիվ զարգանում է քաղաքական երկխոսությունը, առաջին հերթին բարձր մակարդակով: Այս մասին Երևանում մամուլի ասուլիսի ժամանակ հայտարարեց ՌԴ ԱԳ նախարար Սերգեյ Լավրովը:
Լավրովը նշեց, որ միայն այս տարի Փաշինյանն ու Պուտինը երկու հանդիպում են ունեցել, եղել է 8 հեռախոսազրույց, երկու անգամ հանդիպել են կառավարությունների ղեկավարները, ակտիվ համագործակցություն կա համապատասխան նախարարությունների ու հաստատությունների միջև:
Նա խոսել է նաև միջխորհրդարանական համագործակցության մասին՝ հիշեցնելով, որ ՌԴ պետդումայի պատվիրակությունն ապրիլի 24-ին եղել է Երևանում, իսկ մայիսի 26-28-ին Մոսկվա է մեկնելու ԱԺ նախագահ Արարատ Միրզոյանը:
Առաջիկա ամիսներին մի շարք հայկական պատվիրակություններ կլինեն Ռուսաստանում:
