Թուրքիայի նախագահ Ռեջեփ Թայիփ Էրդողանի նոր ամառային պալատի վերջերս հրապարակված նկարները վրդովեցրել են թուրք բնակիչներին, որոնք պայքարում են իրենց ընտանիքներին սննդով ապահովելու համար՝ գրում է National-ը:
Երկու տարի առաջ կառուցված, Մարմարիսից հյուսիս գտնվող, 74 միլիոն դոլար արժողությամբ պալատի առաջին նկարները ցուցադրվել են Թուրքիայի տնտեսական ճգնաժամի ֆոնին, երբ ավելանում է աղքատությունը, ռեկորդային մակարդակի հասնում գնաճը:
Լուսանկարների հրապարակումը համընկել է նաև Էրդողանի կնոջ՝ Էմինեի ծաղրական մեկնաբանությունների հետ: Թուրքիայի առաջին տիկինը մարդկանց առաջարկում է կրճատել իրենց սննդի չափաբաժինը՝ խուսափելու համար ավելորդ ծախսերից: Շատ քաղաքացիներ արձագանքել են՝ մատնանշելով Էմինեի շքեղության հանդեպ թուլությունը՝ ասում է National-ը:
Մարդիկ դժգոհում են, որ իրեն հասարակ մարդ ներկայացնող նախագահն այսօր ապրում է սուլթանի նման, շքեղ պալատներում: Ընդդիմադիր պատգամավորներից մեկն էլ նշել է, որ Էրդողանը պալատներ ունի նաև Անկարայում ու Վանում, ինչպես նաև մասնավոր օդանավեր: Ըստ ընդդիմադիր գործչի՝ ժողովուրդը հոգնել է իշխանությունների երկերեսանիությունից, մարդիկ զայրանում են այդ շքեղությունից, քանի որ մեծ դժվարությամբ են օրվա հացը ձեռք բերում: