«Եռաբլուրում» լրագրողներին թույլ չեն տվել լուսաբանել բարձրաստիճան պաշտոնյաների, այդ թվում՝ վարչապետ Նիկոլ Փաշինյանի այցը:
Ոստիկանները որևէ պատասխան չտվեցին, թե ինչու թույլ չեն տալիս լրագրողներին առաջանալ:
«Ով ձեզ ասել է, թե որտեղ կանգնեք, իրենից էլ հարցրեք, թե ձեր հետագա գործունեությունն ինչպես եք ծավալելու: Առանց մեկնաբանությունների, մենք մեր ծառայությունն ենք անում, մեզ հարցեր մի տվեք»,- ասաց ոստիկաններից մեկը:
Լրագրողները նշեցին, որ իրենց հրավիրել են լուսաբանելու վարչապետի այցը «Եռաբլուր», չեն հրավիրել լուսաբանելու մինչև աստիճաններ. «Կարո՞ղ եք հիմք ցույց տալ, որ թույլ չեք տալիս: Կամ նշեք, թե ո՞վ է ձեզ հանձնարարել թույլ չտալ»,- ասացին լրագրողները:
Քիչ անց լրագրողներին մոտեցավ քաղաքացիական համազգեստով անվտանգության աշխատակիցներց մեկը և ասաց. «Պետական մակարդակով անցկացվում է միջոցառում: Մենք ոչ մեկին չենք խանգարում: Խնդրում եմ՝ մտեք ձեր սահմանը, ձեր տեղը, ձեզ համար նախատեսված վայրը»:
Դրանից հետո եկան կարմիրբերետավորները, շարքով կանգնեցին և փակեցին լրագրողների դիմացը: