Առկա է կալանավորումների բավարարման աննախադեպ բարձր ցուցանիշ։ Այս մասին ԱԺ-ում կալանքի՝ որպես խափանման միջոցի կիրառման ինստիտուտի արժեզրկման, դատական գործերի «ձեռքով» մակագրման կարգի խախտումների և դրանց վերացման վերաբերյալ աշխատանքային քննարկմանը հայտարարեց ԱԺ «Հայաստան» խմբակցության պատգամավոր Արամ Վարդևանյանը։
Նա նշեց, որ 2021 թվականի հոկտեմբեր-նոյեմբեր ամսիներին փորձել է պարզել խափանման միջոց կալանավորման վերաբերյալ վիճակագրական տվյալները, և, ըստ պատգամավորի, պատկերը ծայրահեղ անհանգստացնող է եղել։
«Դատարաններին ներկայացված կալանավորման միջնորդությունների 80 տոկոսից ավելին բավարարվել է, սա չի կարող նորմալ լինել։ ԲԴԽ-ն ասում էր՝ «դատավորներ, շատ մի խորացեք՝ հիմնավոր կասկածը գնահատելիս, քննիչը մի քանի փաստական տվյալ է բերել, բավարարեք, անցեք առաջ»։ Արդարադատություն նախարարությունն էլ օգտագործում է կարգապահական վարույթների հարուցումը որպես դատավորների նկատմամբ ճնշումների, ընդհուպ հաշվեհարդարի հերթական գործիք, ու արդյունքում ունենում ենք շատ վտանգավոր պատկեր՝ կալանավորումների բավարարման աննախադեպ բարձր ցուցանիշ»,-ասաց նա։
Ըստ Վարդևանյանի՝ կալանավորումների բարձր ցուցանիշը պայմանավորված է նաև նրանով, որ դատարաններն ուղղակի ասում են՝ կա խոչընդոտելու, թաքնվելու կամ նոր հանցանք կատարելու ռիսկ։ «Թե դա ինչո՞վ է պայմանավորված, ո՞ր փաստական տվյալն է հիմքում, չեն ասում»,-նշեց նա։
Անդրադառնալով դատական գործերի՝ «ձեռքով» մակագրման կարգի խախտումներին՝ Վարդևանյանը նշեց, թե արդեն նույնսիկ դատարանների աշխատակազմերի ղեկավարներն են մակագրման հարցերով զբաղվում, ինչը, ըստ նրա, աբսուրդ է։
