Ղազախստանի նախագահ Կասիմ Ժոմարտ Տոկաևը Սամատ Աբիշին ազատել է Ազգային անվտանգության կոմիտեի փոխնախագահի պաշտոնից, հայտնում է tengrinews.kz կայքը:
Հայտնի է, որ նախկին պաշտոնյան երկրի առաջին նախագահ Նուրսուլթան Նազարբաևի զարմիկն է: Ավելի վաղ որոշ ղազախական լրատվամիջոցներ տեղեկություն էին տարածել առ այն, որ Սամատ Աբիշը ձերբակալվել է Ալմաթիում, սակայն տեղեկություն չի հաստատվել:
Նշվում էր, որ Ղազախստանի Ազգային անվտանգության կոմիտեի նախկին նախագահ Քարիմ Մասիմովի առնչությամբ հետաքննություն է սկսվել իշխանության զավթման փաստով: Վերջին օրերին մի քանի փորձագետներ հանդես են եկել այն տեսակետով, որ Ղազախստանում հեղաշրջման փորձի մասշտաբները վկայում են երկրի իշխանության ամենաբարձր օղակներում դավաճանության մասին, գրում է gazeta.ru-ն:
Ղազախստանում հունվարի երկուսից սկսված զանգվածային բողոքի ակցիաների ֆոնին նախագահ Տոկաևը բողոքի ցույցերի համատեքստում հայտարարել էր, որ այսուհետ ինքն է Ղազախստանի Անվտանգության խորհրդի ղեկավարը՝ այդ պաշտոնից ազատելով Նազարբաևին։
Ղազախստանում զանգվածային ցույցերը սկսվել են 2022 թվականի սկզբին. երկրի արևմուտքում գտնվող Ժանաոզեն և Ակտաու քաղաքների բնակիչները դեմ են արտահայտվել հեղուկ գազի գների կրկնակի բարձրացմանը: Ավելի ուշ բողոքի ակցիաները տարածվել են այլ քաղաքներում։ Ի պատասխան՝ իշխանությունները մինչև հունվարի 19-ը արտակարգ դրություն են հայտարարել ամբողջ երկրում։
Հունվարի 5-ին Ղազախստանի նախագահ Կասիմ Ժոմարտ Տոկաևը լուծարել է կառավարությունը և դարձել Անվտանգության խորհրդի ղեկավար։ Իր գլխավորությամբ Անվտանգության խորհրդի առաջին նիստում Տոկաևը Ղազախստանում ստեղծված իրավիճակը որակել է որպես պետության ամբողջականությունը խաթարող և նշել, որ ՀԱՊԿ-ից օգնություն է խնդրել «ահաբեկչական սպառնալիքը հաղթահարելու համար»։ ՀԱՊԿ Հավաքական անվտանգության խորհուրդը հավաքական խաղաղապահ ուժեր է ուղարկել Ղազախստան՝ երկրում իրավիճակը կարգավորելու համար։ Հունվարի 7-ին Տոկաևը հայտարարել է, որ ահաբեկիչները, այդ թվում՝ արտասահմանից ժամանածները, շարունակում են դիմադրել, և խոստացել է ոչնչացնել նրանց, ովքեր վայր չեն դրել զենքերը։
