Չինաստանի բանակը, ԱՄՆ Կոնգրեսի Ներկայացուցիչների պալատի խոսնակ Նենսի Փելոսիի՝ Թայվան սկանդալային այցի ֆոնին, զորավարժություններ կանցկացնի կղզու շրջակայքի վեց շրջանում: Այս մասին հայտնում է ՌԻԱ «Նովոստի»-ն՝ հղում անելով Global Times թերթին։
Հաղորդվում է, որ զորավարժությունները կանցկացվեն հինգշաբթիից կիրակի։
«Չինաստանի Ժողովրդաազատագրական բանակը հինգշաբթիից կիրակի կանցկացնի նշանակալի զորավարժություններ և ուսումնական գործողություններ, այդ թվում՝ ուղիղ կրակի վարժանքներ Թայվան կղզու շրջակայքում գտնվող վեց շրջանում», - գրում է Global Times-ը:
Հիշեցնենք, որ ԱՄՆ Կոնգրեսի Ներկայացուցիչների պալատի խոսնակ Նենսի Փելոսին դուրս է եկել ԱՄՆ ռազմաօդային ուժերի հատուկ ինքնաթիռից, որը վայրէջք է կատարել Թայվանի մայրաքաղաք Թայբեյի օդանավակայանում:
Տեղում նրան դիմավորել են Թայվանի պաշտոնյաները և մամուլը: Նա լուսանկարվել է իրեն դիմավորած պատվիրակության հետ, ապա շարժվել դեպի տերմինալ, գրում է ՌԻԱ «Նովոստի»-ն։
Փելոսին Թայվանում հայտարարել է, որ իր այցն ապացույց է առ այն, որ ԱՄՆ-ն հանձնառու է «Թայվանի ժողովրդավարության աջակցությանը»: Ամերիկացի պաշտոնյան շեշտել է, որ իր այցը որևէ կերպ չի հակասում կղզու նկատմամբ ԱՄՆ-ի վարած քաղաքականությանը:
Նախօրեին Չինաստանի ԱԳՆ պաշտոնական ներկայացուցիչ Չժաո Լիցզյանը հայտարարել էր, որ Չինաստանի իշխանություններն արդյունավետ ուժ կկիրառեն Փելոսիի Թայվան այցի դեպքում։
«Եթե Փելոսին այցելի Թայվան, դա կլինի կոպիտ միջամտություն Չինաստանի ներքին քաղաքականությանը... և կհանգեցնի շատ լուրջ հետևանքների: Չինաստանի Ժողովրդաազատագրական բանակը ձեռքերը ծալած չի նստի», - ընդգծել էր նա ճեպազրույցում։
Դիվանագետի կարծիքով՝ Փելոսիի այցը Թայվան կապակայունացնի իրավիճակը Թայվանի նեղուցում և հարված կհասցնի Չինաստան-ԱՄՆ հարաբերություններին։
Չինաստանը Թայվանն իր նահանգն է համարում և դեմ է նրա ներկայացուցիչների և այն երկրների իշխանությունների միջև ցանկացած շփման, որոնց հետ Պեկինը դիվանագիտական հարաբերություններ է հաստատել։
Թայվանի հարցը Վաշինգտոնի և Պեկինի հարաբերություններում առանձնակի կարևորություն է ձեռք բերել Ուկրաինայում ստեղծված իրավիճակի ֆոնին։ ՉԺՀ-ն ընդգծում է, որ պատմական և քաղաքական պատճառներով նմանություններ տեղին չեն, և պահանջում է չմիջամտել ներքին գործերին։ ԱՄՆ-ը, պաշտոնապես պահպանելով «մեկ Չինաստանի սկզբունքը» և չունենալով դիվանագիտական հարաբերություններ Թայբեյի հետ, ոչ միայն կապեր է պահպանում կղզու հետ, այլև պարբերաբար զենք է մատակարարում այնտեղ։
