Գերմանացի ռեժիսոր դրամատուրգ, Քրիստիան Պապկենը Հայաստանի և Հայոց ցեղասպանության վերաբերյալ ֆիլմ է նկարահանում, որը ցուցադրվելու է ապրիլի 21-ին՝ Գերմանիայի առաջին ալիքով:
Այսօր հրավիրված մամուլի ասուլիսին նա նշեց, որ ֆիլմը, որը կոչվում է «Հայաստան. ստվերների երկար ճանապարհ», դասվում է երկրների ներկայացման ֆիլմերի շարքին և լինելու է որպես այցեքարտ:
«Ես փորձում եմ ձեր երկիրը ներկայացնել և մատնանշել երկրի առանձնահատկությունները»,- ասաց նա և նշեց, որ իր գնահատմամբ՝ Հայաստանը չափահասության շեմին հասած պատանի է:
«Ցեղասպանությունն առանցքային տեղ է զբաղեցնում այդ ֆիլմում»,- ասաց նա և նշեց, որ ֆիլմը տևում է 45 րոպե:
Նա նաև անդրադարձավ «Մուսա լեռան 40 օրը» վեպին և նշեց, որ այն հայ ժողովրդի ողբերգությունը բավական հստակ կերպով ներկայացնում է:
«Մենք ծրագրել ենք 40 ժամվա ընթացքում 200 դերասանների կողմից շարունակական ընթերցում կազմակերպել այդ վեպի: Լավ է, որ աշխարհը այս 100-րդ տարելիցի առումով դարձյալ զարթնում է»,- ասաց նա և նշեց, որ երբ այդ վեպն արդեն ընթերցված կլինի, իրենք հասարակայնությանը կներկայացնեն, որ այն ոչ միայն վիպական պատում է, այլ փաստացի իրականությունն է ընդգրկում:
«Այս տարի ամբողջ Գերմանիայում Հայոց ցեղասպանության զոհերի հարգման առնչությամբ մի շարք միջոցառումներ են իրականացվելու»,- ասաց նա և նշեց, որ միջոցառման վերջին օրը ցեղասպանագետների են հրավիրել, որոնք կտան պարզաբանումներ Հայոց ցեղասպանության մասին, իսկ միջոցառումը եզրափակելու է հայ օպերային հայտնի երգչուհիներից մեկը:
Նրա գնահատմամբ՝ հասարակությունը դեռևս բավարար տեղեկացված չէ Հայոց ցեղասպանության վերաբերյալ, ինչի ուղղությամբ աշխատանքներ են պետք իրականացնել:
Ռեժիսորն ասաց, որ ուսումնասիրելով տարբեր արխիվային փաստաթղթեր՝ իր համար պարզ դարձավ Գերմանիայի որոշ պատասխանատվությունը Հայոց ցեղասպանության հարցում, ինչն ավելի մեծ ուժ ու թափ է հաղորդել Հայաստանին վերաբերող միջոցառումների իրականացման հարցում:
Գերմանիայի Նյուրնբերգ քաղաքի պետական թատրոնի գեղարվեստական ղեկավար Կլաուս Կուզեմբերգը հատկանշական համարեց, որ միջոցառումները հատկապես Նյուրնբերգում են տեղ ունենալու:
«Մենք հրավիրել ենք պառլամենտականներին, սակայն մեր կարևորագույն խնդիրը համառում ենք հասարակությանը տեղեկացնելը»,- ասաց նա նշեց, որ հետագայում այդ պառլամենտները պետք է առերեսվեն տեղեկացված հասարակության ընտրության հետ:
Նա նաև հայտնեց, որ չեն հրավիրել նաև թուրքական պաշտոնատար անձանց, կրկին նույն պատճառով, որ թիրախը հասարակության տեղեկացվածությունը բարձրացնելն է:
