Այսօր «Անալիտիկ» կենտրոնում տեղի ունեցավ ասուլիս «Խոսքի ազատության աստիճանը ՀՀ-ում, որքանո՞վ են լրագրողները պաշտպանված բռնություններից և ճնշումներից» թեմայով:
Լևոն Մութաֆյանը խոսելով հայաստանյան մամուլի մասին ասաց. «Այսօր հայաստանյան մամուլը համարվում է որոշակիորեն ազատ, որոշակիորեն սեփական հայեցակարգեր ունեցող: Համեմատած սովետականի հետ, մասնագիտական պատրաստվածության, որակավորման խնդիր ունենք այսօր: Անընդհատ հետևում եմ տպագիր և էլեկտրոնային լրատվամիջոցներին և, ցավոք, այսօր լրագրողների մակարդակն իջել է կրիզիսային մակարդակի: Բացի մասնագիտական անգրագիտությունից լրագրողի մոտ կա նաև տարրական գրագիտության խնդիր, շատ լրագրողներ չեն կարողանում անգամ ճիշտ շարադրել իրենց տեքստը: Այսօր ով ուզի ազատորեն կարող է մտնել լրատվական դաշտ, սրանք լրատվական դաշտում բերում են անհետաքրքրության, լրատվական ժանրերի դուրս մղման: Քաղաքական մամուլն իր վրա վերցրեց տնտեսական, գերատեսչական մամուլի գործունեությունները, ինչի արդյունքում ամեն ինչ խառնվեց: Սա ազատության բերած որակական անկումներից մեկն է»:
Բանախոսը նաև նշեց, որ այսօր ՀՀ-ն տարածաշրջանում համարվում է ամենաազատ երկիրը, որտեղ լրագրողի խոսքը, ազատ մտածողությունը մասնակի աղավաղումներով, բայց ամեն դեպքում, տեղ է գտնում: Սակայն անհնար է պատկերացնել լիարժեք ազատություն, և ինչպես միշտ, ով վճարում է, նա էլ պատվիրում է երաժշտությունը: Եթե փորձենք տոկոսային սանդղակով չափել, մամուլն այսօր ազատ է մոտավորապես 55-60 %-ով:
«Մեր լրատվամիջոցների գերակշիռ մեծամասնությունը կախված են այս կամ այն պատվիրատուից, քանի որ կարիք ունեն իրենց գոյությունը պահպանելու: Եթե պատվիրատուն չի բռնանում լրագրողի գաղափարական կոմնորոշումներին, ապա կարելի է մի քիչ հասկանալ: Քաղաքական գործչի կամ ուժերի կողմից գլխավորվող լրատվական կառույցները երբեք չեն կարող ազատ լինել»:
Մութաֆյանը նաև շատ կարևոր խնդիր համարեց Հայաստանում տպագիր մամուլի տպաքանակի նվազումը. «Հայաստանում ապրում ենք տպագիր մամուլի կործանման ժամանակաշրջան, տպագիր թերթը շատ կարևոր և ուրույն տեղ ունի, մարդու ուղեկիցն է, քանի որ այն ձևավորում է որոշակի մշակույթ: Էլեկտրոնային մամուլը այսօր զարգանում է, սակայն պետք է նշեմ, որ այն նույնպես պահանջված չէ: Մեզ համար սկանդալ բառն է կարևոր, եթե ուզում ես՝ կարդան նյութը, ապա պետք է սկանդալ լինի: Այսինքն էժանագին ճանապարհով փորձում ենք ընթերցող գրավել, սակայն ընթերցողները փախչում են: Պետք է հրաժարվել էժանագին, անորակ նյութերից: ԽՍՀՄ-ի ժամանակաշրջանում չորրորդ իշխանությունն ուներ կարևորագույն դեր, սակայն այսօր դա այլևս այդպես չէ»:
Լևոն Մութաֆյանը խոսեց նաև մամուլ-հասարակություն կապի մասին. «Այսօր կորցրել ենք մամուլ-հասարակություն կապը, որը որակավորման անկումների պատճառով է եղել: Այսօր հայաստանյան իրականության առաջ ունենք մեկ խնդիր՝ լավատեսություն առաջացնել հասարակության շրջանում: Այժմ լրագրողներից շատերը վաճառվում են՝ իրենց ազատությունը փոխարինելով փողով, կամ իշխանությունները դիտավորյալ հեղինակազրկում են լրագրողներին, լրատվամիջոցին, որպեսզի ընթերցողի մոտ վստահությունը կորցնի: Այսօր շատ լավ գիտենք, թե ինչ ճանապարհով են սննկացնում տպագիր թերթերին, հեռուստաընկեություններին, էլեկտրոնային կայքերին՝ տնտեսական, քաղաքական ճնշումներ կիրառելով: Պետք է պայքարենք և հասնենք նրան, որպեսզի Հայաստանում նույնպես լինի լրագրողական համերաշխություն:
Խոսելով լրագրողական դաշտում գործող նոր սերնդի մասին, բանախոսը նշեց. «Այսօր լրատվական դաշտում ունենք նոր սերունդ՝ ավելի հզոր, ավելի խիզախ, խելացի, և հույս ունեմ, որ լրատվության նկատմամբ վստահությունը նրանք կկարողանան վերականգնել»: