Ինչպես գիտենք, Հայաստանում փորձում է զարգանալ առցանց առևտրի ոլորտը, սակայն կան մի շարք բացեր, որոնք խանգարում են ոլորտի կայուն զարգացմանն ու առաջընթացին: Հիմնական խնդիրներից մեկն առցանց և աշխարհում տարածված վճարային համակարգերի ոչ լիարժեք գործարկումն է: Paypal վճարման համակարգը ոչ լիարժեք է կիրառվում Հայաստանում, ինչը բազմաթիվ խնդիրներ է առաջացնում առցանց առևտրով զբաղվող և առցանց գործարքներ կատարող կազմակերպությունների և մարդկանց համար: Այս հարցի հետ կապված Analitik.am-ի թղթակիցը նախ զրուցեց առցանց առևտրով զբաղվող մի շարք կազմակերպությունների հետ՝ հասկանալու համար, թե ինչքանո՞ վ է նրանց անհրաժեշտ Paypal վճարման համակարգի ամբողջական գարծարկումը ՀՀ-ում:
Onex Online Express կազմակերպությունից ասացին, որ ներկայումս իրենց միջոցով օգտատերերը կատարում են բազմաթիվ գնումներ արտերկրից և այդ գործընթացում կարևոր տեղ է զբաղեցնում Paypal վճարային համակարգը : Այն հնարավորություն է տալիս վճարումներ կատարել , սակայն թույլ չի տալիս ընդունել վճարումներ արտերկրից, ինչպես նաև ՀՀ-ից լիցքավորել Paypal հաշիվը.«ՀՀ -ում Paypal վճարային համակարգի ներդրումը հնարավորություն կտար հայ արտադրողին վաճառել ապրանքներն արտերկրում և ստանալ դրանց դիմաց վճարումները Paypal-ի միջոցով : Նման վստահելի համակարգի ներդրումը ՀՀ-ում կխթանի հայկական շուկայի զարգացումը և հայկական արտադրանքի արտահանումն այլ երկրներ»:
Eli.am-ի տնօրեն Տիգրան Ճորոխյանն էլ նշեց, որ տրամաբանական չի, որ որևէ օնլայն առևտրով զբաղվող կազմակերպություն հրաժարվի այդ համակարգից. «Խոսքը վերաբերում է հանրության համար վստահելի վճարային համակարգին: Օգուտի մասին խոսելիս՝ կարող եմ ասել, որ ոչ թե կարող է օգուտ տալ, այլ պարտադիր օգուտ կտա: Վերջին շրջանում փորձը ցույց է տալիս, որ Paypal-ի նման վստահելիություն վայելով այլ վճարային համակարգ չկա: Paypal-ի հիմնական առավելություններից մեկն այն է, որ դրա միջոցով գնում կատարելիս՝ ապրանքը չհավանելու կամ անսարք լինելու դեպքում, ապրանքի դիմաց կատարված վճարը միանգամից վերադարձվում է: Օնլայն առևտրով զբաղվող կազմակերպություններն ունեն վճարային համակարգեր, որպեսզի ընդունեն վճարներ՝ օրինակ պլաստիկ քարտերից կամ այլ վճարային համակարգերից, ինչպիսինն են՝Idram-ը, հայկական Mobi-dram ունենք, սրանք բավական տարածված են, բայց սրանցից ոչ մեկը չունի այն հեղինակությունն ու վստահելիությունը, որը հանրության շրջանում հնարավորություն կտա ընդլայնել օնլայն գնումների քանակը: Մարդիկ հիմնականում չեն վստահում առևտրային և վճարային համակարգերին, դրա համար չեն անում առևտուր: Մեր երկրի ներսում ունենք վստահելիության խնդիր. Օրինակ՝ մարդիկ Eli.am -ից չեն օգտվել, չգիտեն որակյալ սպասարկում ունի, թե չէ, կվերադարձնի, թե չի վերադարձնի, օրենքը կպահպանի, թե կխախտի` ասելով իմ գործը չի, առել ես, ինչ ուզում ես արա, ոնց որ սովորաբար տեղի է ունենում Հայաստանում: Մարդուն ասում ես՝ օրենք գոյություն ունի, ասում է այդ օրենքն ինձ չի հետաքրքրում: Կան հանրության լայն շերտեր, որոնք իրազեկման խնդիր ունեն և այդ իրազեկման խնդիրը, որ պետք է կառավարությունն անի՝ օնլայն առևտրի խրախուսման համար, չի անում տարբեր պատճառներով: Ավելի լայն են այն շերտերը, որոնք տեղյակ չեն օնլայն առևտրի առավելություններից, քան այն շերտերը, որոնք տեղյակ են և օգտվում են դրա հնարավորությունից: Հայաստանում հենց միջնորդների բացակայությունը թույլ չի տալիս օնլայն առևտուրը հասցնել թռիչքային աճի տեմպերի » :
Jin.am –ից էլ նշեցին, որ իրենց համար Paypal վճարային համակարգի օգնությամբ արտասահմանից գնումներն ավելի կհեշտանան. «Առանց Paypal-ի ամբողջական գործարկման հիմնական խնդիրը հանդիսանում է այն, որ Globbing-ի պես միջնորդ ընկերություններից ենք հաճախ ստիպված լինում օգտվել»:
Mediamarket.am – ն էլ մեզ հետ զրույցում ասաց, որ առանց Paypal-ի ամբողջական գործարկման հիմնական խնդիրը դրսի հետ առևտրի ոչ մատչելի լինելն է. «Դրսից գնումներ կատարելիս հարցնում են Paypal վճարման համակարգ ունե՞ք: Խնդիրը ներկայումս այնքանով է, որ արտասահմանյան Master Card-ով առևտուր անելիս տոկոս է պահվում, իսկ կոնկրետ Paypal-ում այդ տոկոսը չկա: Այս համակարգը հիմնականում դրսից առևտուր անող մարդկանց համար ավելի հարմար կլինի»:
Մենք զրուցեցինք մի շարք այլ կազմակերպությունների հետ, որոնք առցանց գործարքներ են կատարում և նրանք նույնպես պնդեցին, որ Paypal համակարգի ամբողջական գործարկումը ոչ միայն Հայաստանում կզարգացնի առցանց առևտրի ոլորտը, այլ նաև մարդկանց թույլ կտա ավելի հարմար և շահավետ գործարքներ կատարել, ուստի չեն հասկանում, թե ինչու կառավարությունը չի կարգավորում այս հարցը:
Analitik.am-ը հարցում արեց ՀՀ ֆինանսների նախարարություն՝ պարզելու համար, թե ինչն է պատճառը, որ Հայաստանում չի գործարկվում Paypal վճարային համակարգի ամբողջական տարբերակը, որին ի պատասխան մեզ հայտնեցին, որ դա դուրս է վերոնշյալ նախարարության լիազորությունների տիրույթից:
Նշենք, որ մենք հարցումներ ենք կատարել մի շարք այլ մարմիններ, ուստի առաջիկայում կներկայացնենք ամբողջական հոդված այդ մասին, ինչպես նաև այն մասին, թե ինչ քայլեր պետք է արվի Հայաստանում Paypal համակարգն ամբողջական գործարկելու համար:
Հիշեցնենք, որ որոշ ժամանակ առաջ մի խումբ քաղաքացիներ ստորագրահավաք էին անցկացրել՝ պահանջելով Paypal վճարային համակարգի ամբողջական գործարկում: Ստորագրահավաքին միացել էին հազարավոր մարդիկ:
