Այս տարվա առաջին հինգ ամիսներին (հունվար-մայիս) Հայաստանի տնտեսական ակտիվության ցուցանիշը (ՏԱՑ) կազմել է 4%: Այս մասին Analitik.am-ը տեղեկանում է ՀՀ Ազգային վիճակագրական ծառայությունից (ԱՎԾ):
Ընդ որում, աճ է գրանցվել տնտեսության բոլոր ոլորտներում, ինչն այս տարի առաջին անգամ է արձանագրվել: Համեմատության համար նշենք, որ 2014-ի առաջին չորս ամսիներին ՏԱՑ-ը կազմել էր 3,6% էր, հունվար-մարտին՝ 3,3%։
Հունվար-մայիսին տնտեսության ոլորտներում արձանագրվել է.
Շինարարություն
Նախորդ չորս ամիսներին արձանագրված աճը պահպանվել է` կազմելով 0,5 % 2013թ. հունվար-մայիսի համեմատ (90 միլիարդ 858,1 միլիոն):
Արդյունաբերություն
Արձանագրվել է 0,2% աճ՝ հունվար-ապրիլի 1,4% անկման դիմաց։
Ծառայություններ
2013թ. հունվար-մայիսի համեմատ այս տարի ծառայությունների ծավալն աճել է 3,1 %-ով և կազմել 404 միլիարդ 234,6 մլն դրամ:
Գյուղատնտեսություն
Գյուղատնտեսության համախառն արտադրանքի ծավալը՝ 5,4 %-ով ` կազմելով 160 միլիարդ 754,9 մլն դրամ:
Առևտուր
Առևտրի շրջանառությունն աճել է 5,1 %-ով և կազմել 812 մլրդ 519,5 մլն դրամ: Նկատենք, որ առևտրի շրջանառության ծավալների աճը հունվար-մայիսին նույն մակարդակում է եղել, ինչ չորս ամիսներին՝ 5,1%։
Արտաքին առևտրաշրջանառությանն աճել է 2,3%-ով՝ կազմելով 2,3 մլրդ դոլար, ըսն որում՝ արտահանումն աճել է 3,2%-ով (580 մլն դոլար), ներմուծումը՝ աճել 2%-ով (1 միլիարդ 698,9 մլն դոլար):
Էլեկտրաէներգիա
Էլեկտրաէներգիայի արտադրությունն աճել է 0,2 տոկոսով (3 միլիարդ 251 մլն կՎտ.ժ): Այսինքն՝ էներգետիկ ոլորտում տարեսկզբից պահպանվող անկումը հունվար-մայիսին դադարել է և արձանագրվել է աճ։
Աշխատավարձ
Պետական համակարգում միջին ամսական անվանական աշխատավարձը հունվար-մայիսին աճել է 5,4%-ով՝ կազմելով 138,5 հազ. դրամ, մասնավոր հատվածում՝ 8%-ով, մինչև 189,6 հազ. դրամ։
Հիմնվելով այս տրվյալների վրա՝ կարող ենք ասել, որ ընդհանուր առմամբ հայաստանյան տնտեսությունում ակտիվություն է նկատվում: Բայց հարկ է նշել, որ դա ոչ թե նոր կառավարության գործունեության արդյունքն է, որը ձևավորվել է այս տարվա ապրիլին՝ Հովիկ Աբրահամյանի գլխավորությամբ, այլ՝ նախորդ կառավարության, քանի որ նշված ցուցանիշներն ներառում են այս տարվա առաջին երեք ամիսները, երբ ՀՀ վարչապետը դեռևս Տիգրան Սարգսյանն էր: Ու թեև հունվար-մայիսի ցուցանիշները լավատեսական են, սակայն ուրախանալու համար դեռ շուտ է, տարվա ավարտին դեռ 7 ամիս կա:
