Ինչպես արդեն հայտնել ենք, Գեղամ Մանուկյանն այսօր անժամկետ հացադուլ է հայտարարում Նիկոլ Փաշինյանի հրաժարականի պահանջով. «Ցավոք, ես այսօր հացադուլ հայտարարում եմ ոչ թե օտար հարստահարիչի դեմ, այլ մեր երկրի վարչապետի հրաժարականի պահանջով»,-նշեց նա լրագրողների հետ զրույցում:
Մանուկյանի խոսքերով, վարչապետը, ով միայնակ, առանց խորհրդակցելու որևէ մեկի հետը, գաղտագողի ստորագրել է կապիտուլյացիոն հայտարարություն, չպետք է մնա. «Նա փլուզել է մեր արտաքին դիվանագիտական հարաբերությունները ռազմավարական դաշնակիցների, դաշնակցի, նաև այլ երկրների հետ: Նա կազմալուծել է կառավարման ողջ համակարգը, որի արդյունքը տեսանք անցնող ամիսների ընթացքում, երբ չէր գործում պետական կառավարման համակարգը: Նա նվաստացուցիչ պայմաններով փաստաթուղթ է ստորագրել այն դեպքում, երբ տարբեր փուլերում ավելի նպաստավոր պայմաններում փաստաթուղթ սոտրագրելու հնարավորություն է ունեցել: Մեր հայրենիքի մի մասը թշնամուն հանձնողը չպետք է մնա»:
«Ցավոք անցած 10 օրերին պարզ դարձավ, որ նա շարունակում է կառչած մնալ աթոռին, պատրաստ է զոհաբերել բոլորին, միայն թե ինքը մնա վարչապետի աթոռին»,-նշեց նա:
Մանուկյանը հույս ունի, որ իր պայքարն արդյունք կտա: Նա հացադուլի նստելու է կառավարության մոտ:
