Հայաստանի Հանրապետության 2015թ. պետական բյուջեի նախագծով տնտեսական քաղաքականության հիմնական շեշտադրումները դրվելու են երկու խումբ հիմնական ուղղությունների վրա. առաջին՝ գործարար միջավայրի բարելավում ու արտահանման զարգացում, երկրորդ՝ հենքային ոլորտների հետևողական զարգացում: Այս մասին Ազգային ժողովի մշտական հանձնաժողովների համատեղ նիստում ՀՀ 2015թ. պետական բյուջեի նախագծի քննարկման ժամանակ նշեց ՀՀ վարչապետ Հովիկ Աբրահամյանը: «Տնտեսաիրավական հարաբերությունների կառուցումը պետք է ծառայի պետության նկատմամբ գործարարների վստահության ամրապնդմանը՝ որպես երկրում բարձր գործարար ակտիվության և կայուն ներդրումային հոսքերի ներգրավման երաշխիք»,-ասաց ՀՀ վարչապետը:
Աբրահամյանի խոսքով՝ մասնավոր հատվածի հետ գործընկերային հարաբերությունների կառուցման հենքը կլինի գործունեության հավասար պայմանների ապահովումն ու երաշխավորումը: «Ազգային ժողովում այժմ քննարկվում է «Ավելացված արժեքի հարկի մասին» օրենքում փոփոխություններ կատարելու մասին նախագիծը, որի իմաստը պետության և տնտեսվարողի համար հավասար պայմանների կիրառումն է, երկակի ստանդարտների բացառումը: Օրինակ, հիմա պետությունը գործարարին ասում է, եթե պատվիրատուն ստացել է ապրանքը, կատարիր քո հարկային պարտավորությունները՝ անգամ եթե գումարն ամբողջությամբ չես ստացել: Սակայն, եթե նույն տնտեսվարողը ցանկանում է ստացած կանխավճարը դեռևս չհամարել հարկվող եկամուտ, պետությունն ասում է՝ ոչ հիմա հաշվարկիր: Սա անհավասար պայմաններ է ստեղծում տնտեսվարողի համար, նվազեցնում նրա շրջանառու միջոցները»,- ընդգծեց ՀՀ վարչապետը:
Նա ընդգծեց, որ հարկավոր է ցուցաբերել իրատեսական և հավասար մոտեցում առկա խնդիրները կարգավորելու համար: «Մենք նախ պետք է ազատենք փոքր բիզնեսին: Չեմ կարծում, որ մեր քայլերը հաջողություն կունենան հենց 2015թ., սակայն կարծում եմ, որ սա արդյունավետ քայլ կլինի մեր կողմից՝ ուղղված հավասար պայմանների ստեղծմանը»,- նշեց ՀՀ վարչապետը:
ՀՀ 2015թ. պետական բյուջեի նախագծով ներկայացված բազմաթիվ ծրագրեր նմանապես քայլ առ քայլ նպատակաուղղված են Հայաստանի մրցակցային առավելությունների բացահայտմանը և ներդրումների խրախուսմանը, լինի դա միջավայրի ձևավորման, թե ներդրումային ծրագրերի հավաքագրման և տարբեր ձևաչափերով օտաերկրյա և տեղական ներդրումների ներկայացման եղանակով: Ստվերի դեմ պայքարը ևս քայլ առ քայլ բարելավվող գործընթաց է: «Մենք կախարդական փայտիկ չունենք, որ կարողանանք վերացնել տարիներով ձևավորված արատավոր պրակտիկան, սակայն ունենք կամք և վճռականություն դա քայլ առ քայլ իրականացնելու: Մեր թիրախը խոշոր բիզնեսն է: Եվ եթե խոշոր բիզնեսին հաշվետու դարձնելու մեր քայլերը ոմանք դիտում են որպես փոքր բիզնեսին ճնշելու քայլեր, ես հայցում եմ ձեր համբերությունը և աջակցությունը: Վստահ եմ, որ ժամանակն ամեն ինչ իր տեղը կդնի: Փոքր բիզնեսը մենք դիտարկում ենք որպես զբաղվածության աղբյուր և ստեղծելու ենք պայմաններ դրա արտոնյալ աշխատանքի համար: Մենք հետևողականորեն և հաստատակամ նվազեցնելու ենք ստվերը»,- ասաց Աբրահամյանը:
Նա ընդգծեց, որ երկակի ստանդարտների բացառման և պետություն-տնտեսվարող հարաբերությունները հնարավորինս կարգավորելու և թափանցիկ աշխատելու ուղղությամբ ակտիվորեն շարունակվելու են տեսչական բարեփոխումները: «Որքան կանոնակարգված և թափանցիկ լինեն ստուգումներն, այնքան ավելի լավ մեզ համար: Այժմ մեր մշակած օրենքի նախագիծը գտնվում է Ազգային ժողովում և կոչ եմ անում ամենայն ուշադրությամբ քննարկել և շուտափույթ ընդունել այն: Հիմնական աշխատանքներն ուղղված են լինելու տեսչություններում ռիսկի վրա հիմնված ստուգումների համակարգի ամբողջական ներդրմանը, տեսչական համակարգի օպտիմալացման ծրագրի մեկնարկին, որն ավարտին կհասցնենք երեք տարիների ընթացքում»,- ասաց ՀՀ վարչապետը: