Հնարավոր չէ մեկուսացնել Հայաստան ժամանող բոլոր ուղևորներին: Դա հնարավոր չէ որևէ երկրում: Լրագրողների հետ զրույցում հայտարարեց Առողջապահության նախարար Արսեն Թորոսյանը՝ հավելելով, որ ամեն ինչ արվում է հակահամաճարակային միջազգային խորհուրդների համաձայն. «Մեկուսացում ցուցված է միայն հաստատված դեպքի անմիջական կոնտակտներին, ինչով մենք զբաղվել ենք միշտ ու զբաղվում ենք նաև հիմա»:
Ինչ վերաբերում է երեկ հայտնաբերված երեք պացիենտներին, Թորոսյանը նշել է, որ նրանց մասով արվում են բոլոր անհրաժեշտ միջոցառումները. «Մի դեպքում ունենք մեծ շրջանակ, որոնցից բոլորը հայտնի են:
Այդ շրջանակը կարող է լինել խանութում առևտուր, հարևանի հետ շփվել և այլն: Շրջանակը հնարավոր է մինչև 50 հոգի դառնալ: Նաև մեծ է Իտալիայի քաղաքացու շրջանակը, նրանք բոլորը միանգամից մեկուսացվել են իրենց բնակավայրերում: Դա առանձնացված շենք է: Այն Երևանում է»:
Արսեն Թորոսյանը նշեց, որ հնարավոր չէ ու իմաստ էլ չկա մեկուսացնելու Հայաստան ժամանող հարյուրավոր քաղաքացիներին. «Դա վերաբերում է նաև Իտալիայից, Չինաստանի, Իրանից ժամանողներին: Խնդիրն այն է, որ դեպքը վաղ հայտնաբերվի, թեստավորվի, կոնտակների շրջանակը հայտնաբերվի, փոխանցման ուղին կոտրվի:
Դրանից ավել բան որևէ վարակիչ հիվանդության դեպքում չի արվում»:
Նախարարը հիշեցրեց անցած տարվա կարմրուկի բերովի դեպքը, որի ժամանակ ևս նույն գործողություններն են կատարվել: